काठमाडौं । प्रतिनिधिसभा सदस्य (सांसद) पुरुषोत्तम यादवले देशमा बढ्दो लागूऔषध दुर्व्यसन र तस्करीप्रति सरकार गम्भीर बन्नुपर्ने भन्दै तत्काल कडा राष्ट्रिय कार्ययोजना ल्याउन माग गरेका छन् ।
बिहीबार प्रतिनिधिसभाको बैठकमा बोल्दै सांसद यादवले देशका युवा लागूऔषधको दलदलमा फस्दै गएको अवस्थामा पनि सरकार प्रभावकारी रूपमा प्रस्तुत हुन नसकेको आरोप लगाए । उनले सरकारलाई तत्काल ठोस रणनीतिसहित लागूऔषध नियन्त्रण अभियान अघि बढाउन आग्रह गरे ।
सांसद यादवले पछिल्लो १५ दिनमा सिरहा जिल्लामा मात्रै लागूऔषध सम्बन्धी ६ वटा मुद्दा दर्ता भएको, १२ जना पक्राउ परेको तथा करिब ४१ किलो गाँजा र १०९ ग्राम खैरो हेरोइन बरामद भएको तथ्य प्रस्तुत गर्दै यसले देशभरको अवस्था झन् भयावह रहेको संकेत गर्ने बताए ।
उनले यस विषयलाई राज्य व्यवस्था तथा सुशासन समितिदेखि सञ्चारमाध्यमसम्म पटक–पटक उठाउँदै आएको उल्लेख गर्दै सरकारले अझैसम्म स्पष्ट कार्ययोजना र युवालाई लागूऔषधको कुलतबाट बचाउने दृढ इच्छाशक्ति देखाउन नसकेको टिप्पणी गरे ।
सांसद यादवले लागूऔषध नियन्त्रणको सफलता पक्राउको सङ्ख्याले नभई कुलतमा फस्ने युवाको सङ्ख्या घटेको आधारमा मूल्याङ्कन हुनुपर्ने धारणा राखे । उनले लागूऔषध तस्करीमा संलग्नमाथि निर्मम कारबाही गर्न तथा प्रभावकारी राष्ट्रिय कार्ययोजना तत्काल लागू गर्न सरकारसँग जोडदार माग गरे ।
