काठमाडौं । आम जनता पार्टी (आजपा) का अध्यक्ष प्रभु साहले राष्ट्रपति रामचन्द्र पौडेलले संविधान, राष्ट्रियता र आफ्नो पदीय गरिमा जोगाउन नसकेको आरोप लगाउँदै तत्काल राजीनामा दिन आग्रह गरेका छन्।
बिहीबार आजपा सचिवालय बैठकलाई सम्बोधन गर्दै अध्यक्ष साहले राष्ट्रपति पौडेल वर्तमान सरकारको “रबरस्ट्याम्प” बनेको आरोप लगाउँदै संविधानको संरक्षकको भूमिकामा असफल भएको दाबी गरे। उनले राष्ट्रपति अब राष्ट्रियता र संविधानको रक्षा गर्न नसक्ने अवस्थामा पुगेको टिप्पणी गरे।
साहले वैकल्पिक विकास वित्त परिचालन विधेयक, २०८३ प्रमाणीकरण गरी विदेशी नागरिकलाई सरकारी संस्थाको प्रमुख कार्यकारी अधिकृत (सीईओ) बन्ने बाटो खुलाएको तथा विदेशीलाई वंशजको नागरिकता दिने व्यवस्था राष्ट्रिय हितविपरीत भएको आरोप लगाए। उनले नेपाली पूँजी विदेश लैजान सहज हुने व्यवस्था गरिएको भन्दै यसमा राष्ट्रपतिले आफ्नो संवैधानिक जिम्मेवारी निर्वाह गर्न नसकेको दाबी गरे।
उनले जेन–जी आन्दोलनका क्रममा उत्पन्न राजनीतिक परिस्थितिमा पनि राष्ट्रपतिले उचित भूमिका खेल्न नसकेको आरोप लगाउँदै भने, “अब तपाईंले पदबाट राजीनामा दिँदा नै देश र जनताको भलो हुन्छ।”
साहले सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३ जारी भएको विषय, संसद्को अधिवेशन स्थगित गरी अध्यादेश ल्याइएको प्रक्रिया तथा विधिसम्मत नियुक्ति भएकालाई हटाउने सरकारी कदममा पनि राष्ट्रपतिले मौन समर्थन गरेको आरोप लगाए।
यस्तै, दरबार हत्याकाण्डको छानबिन गर्ने सरकारको निर्णय उल्लेख गर्दै त्यसबेला गृहमन्त्रीको जिम्मेवारीमा रहेका कारण नैतिक आधारमा पनि राष्ट्रपति पौडेलले पदबाट अलग हुनुपर्ने उनको भनाइ थियो।
राष्ट्रपति पौडेलले असार ११ गते वैकल्पिक विकास वित्त परिचालन विधेयक, २०८३ प्रमाणीकरण गरेपछि त्यसको विरोध गर्दै अध्यक्ष साहले राष्ट्रपतिले आफ्नो शपथअनुसारको दायित्व पूरा गर्न नसकेको आरोप लगाएका हुन्।
