वीरगंज । जिल्ला प्रशासन कार्यालय पर्साले जिल्लाभित्रका सार्वजनिक स्थानमा राखिएका नेपालको राष्ट्रिय झण्डाको संरक्षण, मर्मत तथा नियमित फेरबदल गर्न सबै स्थानीय तहलाई निर्देशन दिएको छ ।
प्रमुख जिल्ला अधिकारी भोला दाहालले सबै स्थानीय तहका प्रमुख प्रशासकीय अधिकृतलाई परिपत्र जारी गर्दै विभिन्न चोक, पुल, उद्यान तथा सार्वजनिक स्थलमा राखिएका राष्ट्रिय झण्डा च्यातिएको, रङ्ग उडेको तथा फोहोर अवस्थामा रहेको भन्दै जनस्तरबाट व्यापक गुनासो आएको उल्लेख गरेका छन् ।
परिपत्रमा नेपालको राष्ट्रिय झण्डा राष्ट्रको गौरव, स्वाभिमान र पहिचानको प्रतीक भएकाले यसको मर्यादा र सम्मान कायम राख्नु सबैको साझा संवैधानिक तथा नागरिक दायित्व भएको उल्लेख गरिएको छ । साथै “राष्ट्रिय झण्डा र राष्ट्रिय गान प्रयोग सम्बन्धी कार्यविधि, २०६९” अनुसार सार्वजनिक स्थानमा प्रयोग गरिने झण्डा सफा, सग्लो र मर्यादित अवस्थामा हुनुपर्ने कानुनी व्यवस्था रहेको पनि स्मरण गराइएको छ ।
जिल्ला प्रशासन कार्यालयले स्थानीय तहलाई आफ्ना क्षेत्रभित्र रहेका राष्ट्रिय झण्डाको अवस्था तत्काल निरीक्षण गरी आवश्यक सुधार गर्न निर्देशन दिएको छ ।
निर्देशनअनुसार च्यातिएका, रङ्ग उडेका वा फोहोर भएका झण्डालाई तत्काल हटाई तोकिएको मापदण्डअनुसारका नयाँ झण्डा राख्नुपर्नेछ । त्यसैगरी सार्वजनिक स्थानमा राखिएका झण्डाको नियमित अनुगमन गर्ने प्रणाली विकास गर्न, पुराना वा मक्किएका झण्डालाई जथाभावी नफ्याँकी कार्यविधिअनुसार सम्मानपूर्वक र सुरक्षित रूपमा विसर्जन गर्न तथा झण्डा राखिएका स्थानको सरसफाइ र सुरक्षाको जिम्मेवारी सम्बन्धित स्थानीय तहले लिनुपर्ने उल्लेख गरिएको छ ।
प्रशासनले राष्ट्रिय झण्डाको सम्मान र मर्यादा कायम राख्न सबै स्थानीय तहलाई निर्देशनको प्रभावकारी कार्यान्वयन गर्न आग्रह गरेको छ ।
