वीरगंज । पर्साको बिन्दबासिनी गाउँपालिका–४ अमरपट्टीस्थित सीमाक्षेत्रबाट सशस्त्र प्रहरी बलले ११ किलोग्राम गाँजा जस्तो देखिने पदार्थसहित एक जनालाई पक्राउ गरेको छ ।
मंगलबार बिहान करिब २:०० बजे सशस्त्र प्रहरी बल, नेपाल बीओपी प्रसौनीभाठ्ठा र बीओपी अमरपट्टीबाट खटिएको संयुक्त पैदल गस्ती टोलीले भारततर्फ जाँदै गरेका एक व्यक्तिलाई शंकास्पद अवस्थामा नियन्त्रणमा लिएको हो ।
पक्राउ पर्नेमा पर्साको बहुदरमाई नगरपालिका–८ रामनगरी निवासी अन्दाजी ५८ वर्षीय मनोहर सहनी रहेका छन् । उनको साथमा रहेको प्लास्टिकको बोराभित्र जाँच गर्दा दुई पोकामा राखिएको करिब ११ किलोग्राम गाँजा जस्तो देखिने पदार्थ बरामद भएको सशस्त्र प्रहरीले जनाएको छ ।
बरामद गरिएको गाँजा जस्तो देखिने पदार्थ तथा पक्राउ परेका सहनीलाई आवश्यक कानुनी कारबाहीका लागि प्रहरी चौकी अमरपट्टीमा बुझाइएको सशस्त्र प्रहरी बल, नेपाल नं. १३ गण मुख्यालय पर्साका सूचना अधिकारी सशस्त्र प्रहरी नायब उपरीक्षक मोहनराज निरौलाले जानकारी दिएका छन्।
