वीरगंज । पर्साको धोबीनी गाउँपालिकाले आगामी आर्थिक वर्ष २०८३/८४ का लागि ३१ करोड ७ लाख ९७ हजार रुपैयाँ बराबरको अनुमानित वार्षिक बजेटसहित नीति तथा कार्यक्रम सार्वजनिक गरेको छ ।
सोमबार गाउँपालिकाको सभाहलमा आयोजित १३औँ गाउँसभामा उपाध्यक्ष मञ्जु देवीको अनुमतिमा प्रमुख प्रशासकीय अधिकृत कृष्णा खतिवडाले आगामी आर्थिक वर्षको नीति तथा कार्यक्रम तथा बजेट प्रस्तुत गरेका हुन् ।
प्रस्तुत बजेट अनुसार नेपाल सरकारकाे वित्तिय हस्तान्तरण तर्फ समानिकरण अनुदान ८ कराेड ८५ लाख, शसर्त अनुदान १३ कराेड ५२ लाख, राजश्व बाँडफांड ७ कराेड ७९ लाख २७ हजार र समपुर अनुदान ७० लाख रहेकाे छ ।
यसैगरी प्रदेश सरकारकाे वित्तिय हस्तान्तरण तर्फ राजश्व राजश्व बाँडफांड ४० लाख ७० हजार, प्रदेश समपुरक अनुदान ५६ लाख ७० हजार, स्थानिय राजश्व बाँडफांड २० लाख र आन्तरिक राजश्व ५० लाख रहेकाे छ ।
नीति तथा कार्यक्रम प्रस्तुत गर्दै प्रमुख प्रशासकीय अधिकृत खतिवडाले बजेटको प्रभावकारी कार्यान्वयन, सुशासन, पारदर्शिता तथा प्रभावकारी सेवा प्रवाहमार्फत धोबीनी गाउँपालिकालाई पर्सा जिल्लाकै उत्कृष्ट स्थानीय तहका रूपमा विकास गर्ने लक्ष्य रहेको बताए ।
गाउँसभालाई सम्बोधन गर्दै गाउँपालिका अध्यक्ष मदन प्रसाद चौहानले आगामी वर्ष शिक्षा, स्वास्थ्य, कृषि, महिला तथा बालबालिकाको सशक्तीकरण, पर्यटन प्रवर्द्धन तथा भौतिक पूर्वाधार विकासलाई उच्च प्राथमिकतामा राखिएको जानकारी दिए ।
उनले विकास निर्माणका योजनालाई तीव्र गतिमा अघि बढाइने तथा नागरिकले सहज, छिटो र प्रभावकारी सेवा प्राप्त गर्ने वातावरण निर्माणमा गाउँपालिका प्रतिबद्ध रहेको बताए ।
अध्यक्ष चौहानको अध्यक्षतामा सम्पन्न गाउँसभामा उपाध्यक्ष मञ्जु देवी कुर्मिन, वडाध्यक्षहरू, कार्यपालिका सदस्य, गाउँसभा सदस्य तथा कर्मचारीहरूको सहभागिता रहेको थियो ।
