वीरगंज । पर्साको जगरनाथपुर गाउँपालिकाले सोमबार २३औँ राष्ट्रिय धान दिवस तथा रोपाइँ महोत्सव–२०८३ विविध कार्यक्रमका साथ मनाएको छ । गाउँपालिकाको वडा नं. ४ हरपुरस्थित एक कृषकको खेतमा आयोजित कार्यक्रममा जनप्रतिनिधि, कर्मचारी र किसानहरू सहभागी भई सामूहिक रूपमा धान रोपाइँ गरेका थिए ।
“जलवायुमैत्री प्रविधि, धानमा आत्मनिर्भरता र समृद्धि” भन्ने नाराका साथ आयोजित कार्यक्रममा गाउँपालिका अध्यक्ष श्रीकान्त प्रसाद यादव स्वयं खेतमा उत्रिएर किसानहरूसँगै धान रोप्दै कृषि पेशाप्रति सम्मान व्यक्त गरेका थिए ।
सो अवसरमा अध्यक्ष यादवले आफू किसानको छोरा भएकाले किसानको पीडा, पसिना र परिश्रमलाई नजिकबाट बुझेको बताए । कृषि नेपाली जीवन, संस्कृति र अर्थतन्त्रको प्रमुख आधार भएको उल्लेख गर्दै उनले खेतमा पसिना बगाउने किसानको सम्मान गर्नु भनेको राष्ट्रको भविष्य सुरक्षित गर्नु भएको धारणा राखे ।
उनले किसानको हक, हित र समृद्धिका लागि जगरनाथपुर गाउँपालिका सधैँ प्रतिबद्ध रहने बताउँदै आधुनिक कृषि प्रविधिको विस्तार, सिँचाइ सुविधा, गुणस्तरीय मल–बीउको सहज उपलब्धता तथा उत्पादनको उचित बजारीकरणमार्फत कृषि क्षेत्रलाई थप सशक्त बनाइने प्रतिबद्धता व्यक्त गरे ।
“किसानको मुस्कान नै हाम्रो सफलताको मापन हो,” अध्यक्ष यादवले भने, “कृषि उत्पादन वृद्धि गर्दै आत्मनिर्भर जगरनाथपुर र समृद्ध नेपाल निर्माणका लागि सबैले मिलेर काम गर्न आवश्यक छ ।”
कार्यक्रममा गाउँपालिकाकी उपाध्यक्ष बविता सिंह क्षेत्री, प्रमुख प्रशासकीय अधिकृत सन्देश कुमार यादव, वडा नं. ४ का अध्यक्ष नेपाली कुशवाहालगायत जनप्रतिनिधि, कर्मचारी तथा स्थानीय किसानहरूको उल्लेखनीय सहभागिता रहेको थियो ।
राष्ट्रिय धान दिवसको अवसरमा आयोजित रोपाइँ महोत्सवले कृषि पेशाप्रति सम्मान अभिवृद्धि गर्नुका साथै आधुनिक र जलवायुमैत्री कृषि प्रविधिको प्रयोगमार्फत उत्पादन वृद्धि गर्ने सन्देश दिएको गाउँपालिकाले जनाएको छ ।
