वीरगंज । नारायणी अस्पतालको आयोजना तथा अन्तर्राष्ट्रिय रेडक्रस तथा रेडक्रिसेन्ट महासंघ (आईएफआरसी) र नेपाल रेडक्रस सोसाइटीको सहयोगमा “हैजा पूर्वतयारी सुदृढीकरण : सिकाइ तथा अनुभव आदानप्रदान कार्यशाला” बिहीबारदेखि वीरगंजमा सुरु भएको छ ।
वीरगंजस्थित होटल क्लार्क रिसोर्ट गण्डकमा आयोजित दुईदिने कार्यशालाको उद्देश्य हैजाजस्ता सरुवा रोगको सम्भावित जोखिम न्यूनीकरणका लागि पूर्वतयारीलाई सुदृढ बनाउनु, विगतका अनुभव तथा सिकाइ आदानप्रदान गर्नु तथा प्रभावकारी प्रतिकार्यका लागि सरोकारवालाबीच समन्वय अभिवृद्धि गर्नु रहेको आयोजकले जनाएको छ ।
“पूर्वतयारी सुदृढ बनाऔँ, प्रमाणमा आधारित अनुभव साझा गरौँ र जीवन बचाऔँ” भन्ने मूल नारासहित सञ्चालन भइरहेको कार्यशालाको अध्यक्षता नारायणी अस्पतालका मेडिकल सुपरिटेन्डेन्ट डा. चितरञ्जन साहले गरेका थिए । कार्यक्रममा प्रमुख अतिथिका रूपमा अन्तर्राष्ट्रिय रेडक्रस तथा रेडक्रिसेन्ट महासंघका नेपाल प्रतिनिधि डेभिड सिर्स सहभागी थिए ।
कार्यक्रममा जिल्ला प्रशासन कार्यालय पर्साका सहायक प्रमुख जिल्ला अधिकारी कृष्ण थापा, नेपाल रेडक्रस सोसाइटी केन्द्रीय कार्यालयकी कार्यकारी निर्देशक मोना अर्याल, नेपाल रेडक्रस सोसाइटी मधेश प्रदेशका अध्यक्ष फुल मोहम्मद मियाँ, खानेपानी तथा ढल व्यवस्थापन विभागका प्रतिनिधि रचित ओझा, नेपाल रेडक्रस सोसाइटीका केन्द्रीय प्रतिनिधिहरू बालकृष्ण सेढाईं, टिकाराज पौडेल र रश्मि झालगायतकाे सहभागिता रहेको थियो ।
कार्यक्रमलाई सम्बोधन गर्दै वक्ताहरूले हैजालगायत जलजन्य तथा सरुवा रोगहरूको जोखिम अझै कायम रहेको उल्लेख गर्दै समयमै पूर्वतयारी, जनचेतना अभिवृद्धि, सुरक्षित खानेपानीको सुनिश्चितता तथा स्वास्थ्य संस्थाहरूको क्षमता विकास अपरिहार्य रहेको बताएका थिए ।
उनीहरूले महामारी नियन्त्रण तथा व्यवस्थापनका लागि सरकारी निकाय, स्वास्थ्य संस्था, रेडक्रस र समुदायबीचको समन्वयलाई अझ प्रभावकारी बनाउनुपर्नेमा जोड दिएका थिए । साथै विगतमा हैजा नियन्त्रणका क्रममा प्राप्त अनुभव, चुनौती र सफल अभ्यासहरूको समीक्षा गर्दै आगामी दिनमा थप प्रभावकारी रणनीति निर्माण गर्न कार्यशाला उपयोगी हुने विश्वास व्यक्त गरिएको थियो ।
दुई दिनसम्म सञ्चालन हुने कार्यशालामा हैजा नियन्त्रण तथा व्यवस्थापन, आपतकालीन स्वास्थ्य तयारी, समुदायस्तरको सचेतना, खानेपानी तथा सरसफाइ व्यवस्थापन, बहुपक्षीय समन्वय तथा महामारी प्रतिकार्य सम्बन्धी विषयमा प्रस्तुति, छलफल र अनुभव आदानप्रदान गरिने जनाइएको छ ।
आयोजकका अनुसार कार्यशालाबाट प्राप्त सुझाव तथा निष्कर्षहरूले भविष्यमा सम्भावित हैजा प्रकोपको प्रभावकारी व्यवस्थापन, जनस्वास्थ्य सुरक्षा तथा स्वास्थ्य प्रणालीको सुदृढीकरणमा महत्वपूर्ण योगदान पुग्ने अपेक्षा गरिएको छ ।
