वीरगंज । पर्साको बहुदरमाई नगरपालिका–८ रामनगरीस्थित श्री मुखदेव सुशिला प्राविधिक माध्यमिक विद्यालयमा छात्रवृत्ति कार्यक्रम अन्तर्गत बालविकासदेखि कक्षा ५ सम्म अध्ययनरत विद्यार्थीहरूलाई पोशाक वितरण गरिएको छ ।
विद्यालयका संस्थापक तथा पूर्व विद्यालय व्यवस्थापन समिति (वि.व्य.स.) अध्यक्ष मुखदेव प्रसादको अध्यक्षतामा आयोजित कार्यक्रममा शैक्षिक सत्र २०८२ अन्तर्गत छात्रवृत्ति कार्यक्रममार्फत विद्यार्थीहरूलाई पोशाक वितरण गरिएको हो ।
विद्यालयका अनुसार विद्यार्थीहरूको शैक्षिक उन्नयन, नियमित विद्यालय उपस्थितिलाई प्रोत्साहन तथा विद्यालयप्रतिको आकर्षण बढाउने उद्देश्यले उक्त कार्यक्रम सञ्चालन गरिएको हो । कार्यक्रममा बालविकास कक्षादेखि कक्षा ५ सम्म अध्ययनरत छात्र–छात्राहरूलाई पोशाक हस्तान्तरण गरिएको थियो ।
कार्यक्रमलाई सम्बोधन गर्दै विद्यालयका प्रधानाध्यापक लक्ष्मीकान्त साहले छात्रवृत्ति तथा प्रोत्साहनमूलक कार्यक्रमले विद्यार्थीहरूमा अध्ययनप्रतिको रुचि अभिवृद्धि गर्ने विश्वास व्यक्त गरे । उनले आर्थिक अवस्था कमजोर भएका परिवारका बालबालिकालाई विद्यालयमा टिकाइराख्न यस्ता कार्यक्रम प्रभावकारी हुने बताए ।
प्रधानाध्यापक साहले विद्यालयले गुणस्तरीय शिक्षा प्रदान गर्न निरन्तर प्रयास गरिरहेको उल्लेख गर्दै विद्यार्थीहरूको सर्वाङ्गीण विकासका लागि अभिभावक, शिक्षक तथा सरोकारवालाबीचको सहकार्य आवश्यक रहेको धारणा व्यक्त गरे ।
विद्यालयले आगामी दिनमा पनि विद्यार्थीको शैक्षिक विकास र सहभागिता बढाउने उद्देश्यले यस्ता प्रोत्साहनमूलक कार्यक्रमलाई निरन्तरता दिने जनाएको छ ।
