वीरगंज । विश्व वातावरण दिवसको अवसरमा गौतम माद्यमिक विद्यालयले विद्यार्थीहरूलाई विभिन्न प्रजातिका विरुवा वितरण गर्दै वातावरण संरक्षणसम्बन्धी जनचेतनामूलक कार्यक्रमहरू सम्पन्न गरेको छ ।
हरियाली संरक्षण तथा जलवायु परिवर्तनका चुनौतीलाई मध्यनजर गर्दै विद्यालयले एलकेजी, युकेजी तथा कक्षा १ मा अध्ययनरत करिब ५ सय विद्यार्थीहरूलाई अशोका, गुलमाेहर, अम्बा लगायतका विभिन्न प्रजातिका विरुवा निःशुल्क वितरण गरेको विद्यालयका कोडिनेटर सौराज प्रधानले जानकारी दिए ।
उनका अनुसार बालबालिकाहरूमा सानै उमेरदेखि वातावरण र वृक्षारोपणको महत्वबारे चेतना अभिवृद्धि गर्ने उद्देश्यले विरुवा वितरण गरिएको हो । विद्यालयले छुटी भएकाे समयमा प्रत्येक विद्यार्थीलाई एक–एक वटा विरुवा प्रदान गर्दै घरमा रोप्न प्रोत्साहित गरेको पठाएकाे थियो ।
कक्षा १ मा अध्ययनरत विद्यार्थी प्रभास साहले विद्यालयबाट प्राप्त विरुवा घरमा रोप्ने र नियमित पानी हालेर हुर्काउने बताए । “घरमा रुख रोप्नका लागि म्यामले विरुवा दिनुभएको छ, म यसलाई राम्रोसँग हुर्काउँछु,” उनले उत्साहित हुँदै भने ।
यसै अवसरमा विद्यालयले वातावरणीय विषयवस्तुमा आधारित कक्षा सजावट प्रतियोगिता पनि आयोजना गरेको थियो । विद्यार्थीहरूमा वातावरण संरक्षणप्रति सचेतना बढाउने, सिर्जनशीलता विकास गर्ने तथा सामाजिक जिम्मेवारीबोध जगाउने उद्देश्यले प्रतियोगिता सञ्चालन गरिएको विद्यालयले जनाएको छ ।
प्रतियोगितामा कक्षा ९ ‘क’ प्रथम, कक्षा ९ ‘घ’ द्वितीय, कक्षा ७ ‘घ’ तृतीय तथा कक्षा ९ ‘ख’ चौथो स्थान हासिल गर्न सफल भएका छन् । विद्यार्थीहरूले पेन्टिङ, चित्रकला, सन्देशमूलक पोस्टर तथा पुनःप्रयोग गर्न सकिने सामग्रीको प्रयोग गरी कक्षालाई वातावरणमैत्री ढंगले सजाएका थिए ।
उनीहरूले हरियाली संरक्षण, वृक्षारोपण, प्रदूषण नियन्त्रण, जलवायु परिवर्तन र स्वच्छ वातावरणको महत्व झल्काउने विभिन्न सिर्जनात्मक प्रस्तुति दिएका थिए ।
विद्यालयका प्रिन्सिपल गणेश क्षेत्रीको अध्यक्षतामा सम्पन्न कार्यक्रममा कोडिनेटरहरू रमेश शर्मा, ललित कर्ण, सौराज प्रधान, शिक्षक–शिक्षिका तथा विद्यार्थीहरूको उल्लेखनीय सहभागिता रहेको थियो ।
प्रतियोगिताको मूल्यांकन सञ्चारकर्मी निरज पिठाकोटे मगर, मानवसेवा आश्रम वीरगञ्जका संस्थापक देवेश गुप्ता तथा एलाईड युथ सोसाइटीका संस्थापक ओमकुमार झाले गरेका थिए ।
