जोतीलाल पंडित /
वीरगंज । भारत सरकारको सहयोगमा रौतहट जिल्लाको राजदेवी नगरपालिका -४ मा रहेको श्री प्राथमिक विद्यालयको विद्यालय तथा पुस्तकालय भवन निर्माणको शिलान्यास भएको छ । मंगलबार वीरगंजस्थित भारतको महावाणिज्य दूतावासका महावाणिज्यदूत देवी सहाय मीना र राजदेवी नगरपालिकाका मेयर भिखारी प्रसाद यादवले संयुक्त रूपमा शिलान्यास गरेका हुन् ।
‘नेपाल – भारत विकास सहयोग अन्तर्गत’ भारत सरकारको अनुदान सहयोगमा ने.रु. २८.४ मिलियन (२ करोड ८४ लाख) परियोजना लागतमा निर्माण हुने दूतावासले जानकारी दिएको छ ।
नयाँ निर्माण हुन लागेको पूर्वाधारमा भर्याङ सहितको दुई तल्ले भवनमा कुल आठ वटा कक्षा कोठा (प्रत्येक तलामा चार वटा) रहनेछन् । यसका साथै छात्र र छात्राहरूका लागि छुट्टाछुट्टै शौचालय, सेप्टिक ट्याङ्की, सोक पिट, ट्युबवेल, सरसफाइ कार्य, विद्युतीय कार्य र अन्य सम्बद्ध सुविधाहरू समावेश हुनेछन् ।
यो परियोजनालाई उच्च प्रभाव सामुदायिक विकास परियोजना (एचआइसीडीपी) को रूपमा लिइएको छ र राजदेवी नगरपालिका मार्फत कार्यान्वयन गरिँदैछ ।
शिलान्यास कार्यक्रममा विभिन्न राजनीतिक दलका प्रतिनिधि, सरकारी अधिकारी, सामाजिक कार्यकर्ता तथा विद्यालयका शिक्षक, विद्यार्थी र अभिभावकहरूको उपस्थिति रहेकाे थियो ।
शिलान्यास कार्यक्रममा राजदेवी नगरपालिकाका मेयर, विद्यालय व्यवस्थापन समितिका पदाधिकारी तथा अन्य सरोकारवालाहरूले भारत सरकारले प्रदान गरिरहेको यस विकासात्मक सहयोगको उच्च प्रशंसा गर्दै धन्यवाद ज्ञापन गरे ।
नजिकको छिमेकी र विकास साझेदारको रूपमा भारत र नेपाल बीच विभिन्न क्षेत्रहरूमा व्यापक र बहु-क्षेत्रीय सहयोग रहँदै आएको छ । यस्ता (एचआइसीडीपी) परियोजनाहरूको कार्यान्वयनले प्रगति र विकास हासिल गर्न नेपाल सरकारले गरिरहेको प्रयासलाई सुदृढ पार्न भारत सरकारको निरन्तर सहयोगलाई प्रतिबिम्बित गर्ने विश्वास लिइएको छ ।
