वीरगंज । पर्साकाे जगरनाथपुर गाउँपालिकाका अध्यक्ष श्रीकान्त प्रसाद यादवले प्रतिभावान युवा महिला क्रिकेट खेलाडी मोनरमा कुमारी पासवानलाई क्रिकेट कीट सहयोग प्रदान गर्नुभएको छ ।
जगरनाथपुर गाउँपालिका–२ निवासी सिकन्दर हजरा दुसादकी छोरी मोनरमा हाल वीरगंजस्थित श्री नेपाल राष्ट्रिय माध्यमिक विद्यालय, श्रीपुरमा कक्षा ८ मा अध्ययनरत छन् । अध्ययनसँगै क्रिकेट खेलमा सक्रिय मोनरमाले जिल्ला स्तरीय महिला क्रिकेट टोलीमा उत्कृष्ट प्रदर्शन गर्दै आफ्नो प्रतिभा देखाउँदै आएकी छन् ।
युवा खेलाडीलाई थप हौसला र प्रोत्साहन प्रदान गर्ने उद्देश्यले गाउँपालिका अध्यक्ष यादवले आवश्यक क्रिकेट सामग्री हस्तान्तरण गर्नुभएको स्थानिय विनय द्विवेदीले वताउनु भयाे । कीट हस्तान्तरण गर्दै अध्यक्ष यादवले गाउँपालिकाभित्र रहेका प्रतिभावान खेलाडीहरूको पहिचान गरी उनीहरूको क्षमता विकासका लागि स्थानीय सरकारले आवश्यक सहयोग गर्दै जाने बताउनुभयो ।
उहाँले खेलकुदले अनुशासन, आत्मविश्वास र नेतृत्व क्षमताको विकास गर्ने भएकाले बालबालिका तथा युवाहरूलाई खेलकुद गतिविधिमा सहभागी हुन आग्रह गर्नुभयो ।
क्रिकेट कीट प्राप्त गरेपछि मोनरमाले आफूलाई थप मेहनत गरेर जिल्लासँगै प्रदेश तथा राष्ट्रिय स्तरमा उत्कृष्ट प्रदर्शन गर्ने प्रेरणा मिलेको बताइन् । स्थानीयवासी तथा अभिभावकहरूले पनि गाउँपालिका अध्यक्षबाट गरिएको सहयोगले युवा खेलाडीहरूलाई उत्साहित बनाउने विश्वास व्यक्त गरेका छन् ।
