वीरगंज । वीरगंज महानगरपालिकाका मेयर राजेशमान सिंहलाई लिखत किर्ते सम्बन्धी मुद्दामा प्रहरीले मंगलबार पर्सा जिल्ला अदालतमा उपस्थित गराएको छ । पर्सा प्रहरीले उनलाई आजै बिहान पर्साकै ठोरीबाट नियन्त्रणमा लिएर अदालतमा पेश गरेको हो ।
अदालत स्रोतका अनुसार मेयर सिंहलाई बिहान करिब ९ बजे अदालतमा उपस्थित गराइएपछि उनको बयान सुरु भएको छ । पर्सा जिल्ला अदालतका न्यायाधीश गायत्री प्रसाद रेग्मीको इजलासमा सिंहको बयान लिने कार्य जारी रहेको छ ।
अदालतले जनाए अनुसार बयान प्रक्रिया सम्पन्न भएपछि आजै थुनछेक बहस तथा मुद्दाको प्रारम्भिक सुनुवाइ हुने छ ।
वीरगंजका स्थानीय लियाकत अलीको जाहेरीका आधारमा नेपाल सरकार वादी रहेको उक्त मुद्दा अदालतमा दर्ता भएको हो । सिंहमाथि झुट्टा विवरण पेश गरी नागरिकता बनाएको तथा लिखत किर्ते गरेको आरोप लगाइएको छ ।
उक्त मुद्दामा मेयर सिंहसँगै उनकी कान्छी श्रीमती तथा इन्द्रावती नगरपालिकाकी रिता भट्टराई र वीरगंज–३ का तत्कालीन स्थानीय पञ्जिकाधिकारी भिखारी रायलाई पनि प्रतिवादी बनाइएको छ ।
अभियोग अनुसार मेयर सिंहले रिता भट्टराईकी छोरी रुविना श्रेष्ठलाई आफ्नै छोरीका रूपमा देखाई फर्जी जन्मदर्ता तयार गरी नागरिकता बनाएको आरोप छ । यद्यपि, सिंहले रिता भट्टराई आफ्नो दोस्रो श्रीमती भएको दाबी गर्दै आएका छन् ।
मुद्दाको सुनुवाइपछि अदालतले मेयर सिंहलाई थुनामा राख्ने वा धरौटी तथा तारेखमा छाड्ने विषयमा आदेश दिने सम्भावना रहेकाे छ ।
