वीरगंज । वीरगंज महानगरपालिकाका मेयर राजेशमान सिंहलाई लिखत किर्ते सम्बन्धी मुद्दामा प्रहरीले पक्राउ गरेको छ।
पर्सा जिल्ला अदालतले जारी गरेको पक्राउ पुर्जीका आधारमा मेयर सिंहलाई पर्साको ठोरी गाउँपालिकास्थित ठोरी भिलेज रिसोर्टबाट मंगलबार बिहान नियन्त्रणमा लिइएको हो । जिल्ला प्रहरी कार्यालय पर्साका प्रहरी नायव उपरीक्षक (डीएसपी) राजु कार्कीका अनुसार पर्सा प्रहरीबाट खटिएको विशेष टोलीले उनलाई पक्राउ गरेको हो ।
पर्सा जिल्ला अदालतले गत जेठ ८ गते लिखत किर्ते सम्बन्धी मुद्दामा मेयर सिंहविरुद्ध पक्राउ पुर्जी जारी गरेको थियो । पक्राउ पुर्जी जारी भएपछि उनी भोलिपल्ट स्वेच्छाले अदालतमा उपस्थित भएका थिए ।
त्यसबेला सञ्चारमाध्यममार्फत आफूविरुद्ध पक्राउ पुर्जी जारी भएको जानकारी पाएपछि न्यायिक प्रक्रियामा सहयोग गर्न अदालत पुगेको उनले बताएका थिए । तर मुद्दाको चापका कारण सो दिन सुनुवाइ हुन नसक्ने जानकारी अदालत प्रशासनले गराएपछि सार्वजनिक बिदापछि पुनः उपस्थित हुने जानकारी दिएर फर्किएको उनको भनाइ थियो ।
अदालतले मेयर सिंहसँगै उनकी कान्छी श्रीमती तथा इन्द्रावती नगरपालिकाकी रिता भट्टराई र वीरगञ्ज–३ का तत्कालीन स्थानीय पञ्जिकाधिकारी भिखारी रायविरुद्ध पनि पक्राउ पुर्जी जारी गरेको छ।
मेयर सिंहले रिता भट्टराईकी छोरी रुविना श्रेष्ठलाई आफ्नै छोरीका रूपमा देखाई फर्जी जन्मदर्ताका आधारमा नागरिकता बनाएको आरोपमा लिखत किर्ते सम्बन्धी मुद्दा दायर भएको छ । यद्यपि, सिंहले रिता भट्टराईलाई आफ्नो दोस्रो श्रीमती भएको दाबी गर्दै आएका छन् ।
सरकारी वकिल कार्यालयका अनुसार वीरगंज–३ निवासी लियाकत अलीले २०८० साल माघमा जिल्ला प्रहरी कार्यालय पर्सामा मेयर सिंहविरुद्ध सरकारी कागजात तथा नागरिकता किर्ते सम्बन्धी उजुरी दिएका थिए । सोही उजुरीका आधारमा चार वटा मुद्दा दायर गरिएकोमा अदालतले लिखत सम्बन्धी कसुरमा पक्राउ पुर्जी जारी गरेको हो ।
यसअघि मेयर सिंहका स्वकीय सचिव सत्यराज घिमिरेलाई प्रहरीले सोमबार अदालत नजिकै रहेको एक कानुन व्यवसायीको कार्यालयबाट नियन्त्रणमा लिएको थियो । तर उनीविरुद्ध नियन्त्रणमा राख्न पर्याप्त आधार र प्रमाण नदेखिएपछि सोही रात रिहा गरिएको प्रहरीले जनाएको छ ।
पक्राउ परेका मेयर सिंहलाई आजै पर्सा जिल्ला अदालतमा उपस्थित गराउने तयारी गरिएको प्रहरीले जनाएको छ।
