वीरगंज । महिला तथा बालबालिका सिकाइ अध्ययन केन्द्र, बजार छपकैया–१, वीरगंज, पर्साको वार्षिक साधारण सभा सम्पन्न भएको छ । साधारण सभाले चन्देश कुमार चौहानको अध्यक्षतामा ९ सदस्यीय नयाँ कार्यसमिति सर्वसम्मत रूपमा चयन गरेको छ ।
संस्थाको कार्यालयमा आयोजित साधारण सभामा संस्थाको वार्षिक प्रगति प्रतिवेदन, आर्थिक प्रतिवेदन तथा आगामी कार्ययोजनामाथि छलफल गरी अनुमोदन गरिएको थियो । सहभागीहरूले महिला सशक्तीकरण, बालअधिकार संरक्षण तथा सामुदायिक शिक्षाको क्षेत्रमा संस्थाले पुर्याउँदै आएको योगदानको प्रशंसा गरेका थिए ।
कार्यक्रममा वीरगंज महानगरपालिका वडा नं. १ का वडा सदस्य विपिन कुमार शाह, सामाजिक संस्था जिल्ला समन्वय समिति पर्साका अध्यक्ष इब्राहिम देवान, समाजसेवी विश्वनाथ शाहलगायत विभिन्न सामाजिक तथा सामुदायिक क्षेत्रका व्यक्तित्वहरूको उपस्थिति रहेको थियो । साथै संस्थाका कार्यसमिति पदाधिकारी, साधारण सदस्य तथा शुभेच्छुकहरूको उल्लेखनीय सहभागिता रहेको थियो ।
नवनिर्वाचित अध्यक्ष चन्देश कुमार चौहानले संस्थाको उद्देश्य र अभियानलाई थप प्रभावकारी बनाउँदै महिला तथा बालबालिकाको क्षमता विकास, शिक्षा तथा सामाजिक रूपान्तरणका क्षेत्रमा सक्रियतापूर्वक काम गर्ने प्रतिबद्धता व्यक्त गरे ।
संस्थाका अध्यक्ष इन्द्रजित श्रीवास्तवको अध्यक्षतामा सम्पन्न साधारण सभा सम्पन्न भएको हो । कार्यक्रममा सहभागीहरूले नवगठित कार्यसमितिलाई सफल कार्यकालको शुभकामना व्यक्त गरेका थिए ।
