वीरगंज । वीरगंजमा निर्माणाधीन घरको पर्खाल भत्किँदा च्यापिएर एक महिला मजदुरको मृत्यु भएको छ । मृत्यु हुनेमा बाराको परवानीपुर गाउँपालिका–४ की ३२ वर्षीया सीतादेवी मुसहर रहेकी छन् ।
वीरगंज महानगरपालिका वडा नं. ६ मा ओम अग्रवालको नयाँ घर निर्माणको क्रममा बिहीबार दिउँसो निर्माणाधीन घरको टपसहित इँटाको पर्खाल अचानक भत्किएर खस्दा त्यही काम गरिरहेकी मुसहर गम्भीर घाइते भएकी थिइन् ।
घाइते अवस्थामै उनलाई तत्काल उद्धार गरी नारायणी अस्पताल लगिएकोमा चिकित्सकले मृत घोषणा गरेको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक हरिबहादुर बस्नेतले जानकारी दिए ।
घटनापछि प्रहरीले घरधनी अग्रवालका छोरालाई नियन्त्रणमा लिएर सोधपुछ गरिरहेको प्रहरी नायब उपरीक्षक बस्नेतले बताए । घटनाको कारणबारे थप अनुसन्धान भइरहेको प्रहरीले जनाएको छ।
