सेढवा । शुक्रबार बिहानदेखि परेको बेमौसमी अविरल वर्षाका कारण पर्सा जिल्लाका किसानले लगाएको हिउँदेबालीमा क्षति पुगेको छ । वर्षाले तोरी, सुर्ती तथा विभिन्न हिउँदे तरकारीबाली प्रभावित बनाएपछि किसान चिन्तित बनेका छन् । पाकेको धान भित्र्याउनसमेत समस्या भएपछि किसान दोहोरो मारमा परेका छन् ।
पर्साको ठोरी गाउँपालिकामा वर्षाको असर बढी देखिएको छ । त्यहाँका किसानले लगाएको तोरी, सुर्ती, राजमा, आलु, काउली, बन्दा, लसुन, मूला र भन्टालगायतका बालीमा क्षति पुगेको किसानहरूले बताएका छन् ।
ठोरी गाउँपालिका–४ विजयबस्तीका किसान अर्जुन श्रेष्ठका अनुसार यस क्षेत्रका किसानको मुख्य नगदेबाली सुर्ती हो । सुर्तीको रोपाइँ सम्पन्न भइसकेको अवस्थामा परेको बेमौसमी वर्षाले बालीमा ठूलो क्षति पुर्याएको उनले बताए । पुनः रोपाइँका लागि आवश्यक बिरुवा उपलब्ध नहुने र खेती गर्ने समयसमेत घर्किसकेकाले किसान थप समस्यामा परेको श्रेष्ठको भनाइ छ ।
त्यस्तै, पर्सामा सबैभन्दा बढी तोरी खेती हुने ठोरी गाउँपालिका–५ सुवर्णपुरका किसान पनि वर्षाबाट प्रभावित भएका छन् । सुवर्णपुरमा प्रत्येक वर्ष करिब ६ सय बिघा जमिनमा तोरी खेती हुँदै आएकोमा यस वर्षको अविरल वर्षाले अधिकांश खेतीमा क्षति पुर्याएको वडाध्यक्ष अष्टबहादुर लोप्चनले बताए ।
उनका अनुसार यस क्षेत्रका करिब ९५ प्रतिशत खेतीयोग्य जमिनमा तोरी छरिसकिएको थियो। किसानले खेत दुई पटक जोतेर रासायनिक मल प्रयोग गरी बीउ छरेका थिए । तर, बीउ उम्रिन नपाउँदै परेको अविरल वर्षाले तोरी खेती नष्ट गरेको उनले जानकारी दिए ।
एकातिर तोरी खेतीका लागि आवश्यक डीएपी, युरिया र पोटासलगायतका रासायनिक मलको अभाव थियो। अर्कोतिर जसोतसो बीउ र मलको व्यवस्थापन गरेर छरेको तोरीसमेत वर्षाले नष्ट गरेपछि किसान थप चिन्तित बनेका छन् ।
अब पुनः खेती गर्न किसानले बीउबिजन, रासायनिक मल र खेत जोताइमा दोहोरो खर्च गर्नुपर्ने अवस्था आएको वडाध्यक्ष लोप्चनले बताए ।
ठोरीसँगै अन्य पालिकाका किसान पनि प्रभावित हुने चिन्ता
बेमौसमी वर्षाको असर ठोरीमा मात्रै सीमित नरही पर्सा जिल्लाका अन्य पालिकामा समेत परेको हुन सक्ने देखिएको छ । जिल्लाका विभिन्न क्षेत्रमा लगाइएको हिउँदे तरकारीबाली र खेतमा पाकेर तयार भएको धान वर्षाका कारण प्रभावित हुन सक्ने भन्दै किसान चिन्तित छन् ।
विशेषगरी धान काट्ने र भित्र्याउने समयमा परेको वर्षाले किसानको मेहनत र लगानी जोखिममा पारेको छ । खेतमा पानी जम्दा धान काट्न, सुकाउन र सुरक्षित रूपमा भण्डारण गर्न समस्या हुने देखिएको छ । तरकारीबालीमा समेत पानी जम्ने र अत्यधिक चिस्यानका कारण क्षति पुग्न सक्ने जोखिम छ ।
ठोरीका किसानले राजमा, आलु, काउली, बन्दा, लसुन, मूला र भन्टालगायतका बालीमा समेत वर्षाले क्षति पुर्याएको गुनासो गरेका छन् ।
यसरी बेमौसमी वर्षाले एकातिर हिउँदेबाली नष्ट गरेको छ भने अर्कोतिर पाकेको धान भित्र्याउन अवरोध पुर्याएको छ । खेतीमा भएको क्षतिको यकिन विवरण संकलन, प्रभावित किसानको पहिचान र आवश्यक राहत तथा सहयोगको व्यवस्था गर्न सम्बन्धित स्थानीय तहले ध्यान दिनुपर्ने देखिएको छ ।
