वीरगंज । वीरगंज महानगरपालिका वडा नम्बर ११ श्रीपुरस्थित कृषि औजार कारखाना पछाडिको झाझी टोलमा अवैध देहव्यापार (यौन धन्दा) सञ्चालन भइरहेको आरोपमा प्रहरीले ७ जनालाई नियन्त्रणमा लिएको छ ।
जिल्ला प्रहरी कार्यालय पर्सा मातहतको वडा प्रहरी कार्यालय श्रीपुरबाट खटिएको विशेष टोलीले स्थानीय वकिल मियाँको घरमा छापामारी उनीहरूलाई नियन्त्रणमा लिएको हो ।
प्रहरीका अनुसार घरधनी वकिल मियाँ अन्सारीले लामो समयदेखि आफ्नै घरमा अवैध देहव्यापार सञ्चालन गराउँदै आएको सूचनाका आधारमा छापा मारिएको थियो ।
छापामारीका क्रममा घरधनी अन्सारी, एक जना पुरुष ग्राहक तथा पाँच जना महिलासहित ७ जनालाई घटनास्थलबाटै नियन्त्रणमा लिइएको प्रहरीले जनाएको छ ।
जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक (डीएसपी) हरि बहादुर बस्नेतले अवैध देहव्यापारको आरोपमा उनीहरूलाई नियन्त्रणमा लिइएको पुष्टि गरेका छन् ।
उनका अनुसार पक्राउ परेकाहरूमाथि हाल जिल्ला प्रहरी कार्यालय पर्सामा राखेर थप अनुसन्धान तथा कानुनी प्रक्रिया अघि बढाइएको छ ।
