वीरगंज । मेडिकल व्यवसायी तथा “राष्ट्र, राष्ट्रियता, धर्म, संस्कृति र नागरिक बचाउ महाअभियान नेपाल” का संयोजक दुर्गा प्रसाईंकाे बयान पर्सा जिल्ला अदालतमा सुरु भएकाे छ ।
प्रसाईंविरुद्ध जिल्ला सरकारी वकील कार्यालय पर्साले सोमबार दर्ता गराएको विद्युतीय कारोबार तथा राज्यविरुद्धको कसुर सम्बन्धी मुद्दामा आज सुनुवाइ हुन लागेको हो । प्रसाईंकाे मुद्दा पर्सा जिल्ला अदालतका न्यायाधीश गायत्री प्रसाद रेग्मीको इजलास नं. १ मा परेको छ ।
पर्सा जिल्ला अदालतका अनुसार हाल प्रसाईंकाे बयान भइरहेको छ भने बयान सकिएपछि बहस सुरु हुनेछ । सोमबार ढिलो गरी अभियोग पत्र दर्ता भएका कारण सुनुवाइ हुन नसकेको अदालतले जनाएको छ ।
वडा प्रहरी कार्यालय विर्ताका प्रहरी निरीक्षक बिक्रम सुवेदीको जाहेरीका आधारमा प्रसाईंविरुद्ध मुद्दा दर्ता गरिएको पर्सा जिल्ला अदालतको वेबसाइटमा उल्लेख छ ।
प्रसाईंलाई गत जेठ ४ गते राति सिद्धार्थ दियालो होटलबाट पर्सा प्रहरीले नियन्त्रणमा लिएको थियो । वीरगंज आएका बेला पक्राउ परेका प्रसाईंले आफूलाई गैरकानुनी रूपमा हिरासतमा राखिएको दाबी गर्दै सर्वोच्च अदालतमा बन्दी प्रत्यक्षीकरणको निवेदन दिएका थिए ।
उक्त निवेदनमाथि सुनुवाइ गर्दै सर्वोच्च अदालतका न्यायाधीश विनोद शर्मा र नित्यानन्द पाण्डेयको इजलासले रिट खारेज गर्दै सरकारका नाममा आवश्यक आदेश जारी गरेको थियो ।
यसअघि सर्वोच्च अदालतले आइतबारसम्म प्रसाईंलाई धरौटी वा हाजिरी जमानीमा रिहा गर्न आदेश दिएको भन्दै त्यसको कार्यान्वयन नभएको आरोपमा उनका समर्थकहरूले सोमबार पर्सा जिल्ला अदालत अगाडिको सडकमा प्रदर्शन गरेका थिए । आज पनि उनका समर्थकहरू अदालत आसपास क्षेत्रमा जम्मा भएका छन् ।
