वीरगंज । मेडिकल व्यवसायी तथा ‘नागरिक बचाउ महाअभियान नेपाल’का संयोजक दुर्गा प्रसाईँको रिहाइको माग गर्दै बिहीबार पुनः वीरगंजमा प्रदर्शन गरिएको छ ।
जिल्ला प्रहरी कार्यालय पर्सा अगाडि जम्मा भएका उनका समर्थकहरूले विभिन्न नारा लेखिएका प्लेकार्ड बोकेर घण्टाघरसम्म प्रदर्शन गरेका थिए । घण्टाघरबाट पुनः जिल्ला प्रहरी कार्यालय अगाडि पुगेर प्रदर्शन समापन गरिएको थियो । प्रदर्शनमा सहभागीहरूले “आवाजविहीन नेपाली जनताको आवाज दुर्गा प्रसाईँलाई बिना शर्त रिहा गर” भन्दै नाराबाजी गरेका थिए ।
टाउकोमा कालो पट्टी बाँधेर प्रदर्शनमा उत्रिएका सयौं समर्थकहरूले “राज्य आतंक बन्द गर”, “प्रहरी दमन बन्द गर”, “दुर्गा प्रसाईँलाई रिहा गर” लगायतका चर्का नारासमेत लगाएका थिए । प्रदर्शनकारीहरूले सरकारले राजनीतिक पूर्वाग्रहका आधारमा प्रसाईँमाथि पक्राउ गरिएकाे आरोप लगाउँदै तत्काल रिहाइको माग गरेका छन् ।
प्रसाईँलाई गत सोमबार वीरगंजस्थित सिद्धार्थ दियालो होटलबाट प्रहरीले राति नियन्त्रणमा लिएको थियो । त्यसको भोलिपल्ट पर्सा प्रहरीले जिल्ला अदालत पर्साबाट विद्युतीय कारोबार ऐन तथा राज्यविरुद्धको कसुरअन्तर्गत ३ दिनको म्याद अनुमति लिएको थियो । उक्त म्याद बिहीबार सकिन लागेको बताइएको छ ।
पक्राउ परेका दिनदेखि नै उनका समर्थकहरुले वीरगंजमा प्रदर्शन गर्दै आएका छन् ।
