वीरगंज । मानव संसाधन समाज नेपाल मधेश च्याप्टरले वीरगंजमा ‘अन्तर्राष्ट्रिय मानव संसाधन दिवस २०२६’ भव्य रूपमा मनाएको छ ।
यस अवसरमा वीरगंज उद्योग वाणिज्य संघ (बीआईसीसीआई) सँगको सहकार्यमा “परिवर्तनको नेतृत्व गर्न मानिसलाई सशक्त बनाऔँ” भन्ने नारासहित ज्ञान आदान–प्रदान कार्यक्रम आयोजना गरिएको थियो । कार्यक्रममा नेतृत्व विकास, कर्मचारी सशक्तीकरण तथा मानव संसाधनको रणनीतिक भूमिकासम्बन्धी प्रस्तुति तथा अन्तरक्रिया गरिएको थियो ।
कार्यक्रमको उद्घाटन वीरगंज उद्योग वाणिज्य संघका अध्यक्ष हरिप्रसाद गौतमले गरेका थिए । कार्यक्रममा डाबर नेपालका फ्याक्ट्री प्रमुख (मानव संसाधन) आशुतोष यादवले प्रमुख वक्ताका रूपमा विशेष प्रस्तुति दिएका थिए ।
मानव संसाधन समाज नेपालका बोर्ड सदस्य एवं मधेश प्रदेश अध्यक्ष अनिल जयसवालको सभापतित्वमा सम्पन्न कार्यक्रममा विभिन्न कम्पनीका मानव संसाधन क्षेत्रमा कार्यरत ३५ जनाको सहभागिता रहेको थियो ।
कार्यक्रममा सहभागीहरूले मानव संसाधन व्यवस्थापनलाई संस्थागत विकासको महत्वपूर्ण आधारका रूपमा जोड दिँदै यस्ता ज्ञान आदान–प्रदान कार्यक्रमले नेतृत्व क्षमता अभिवृद्धि तथा कार्यक्षेत्रमा सकारात्मक परिवर्तन ल्याउन सहयोग पुग्ने विश्वास व्यक्त गरेका थिए ।
