वीरगंज । भारत सरकारको आर्थिक सहयोगमा सप्तरी जिल्लाको सुरुङ्गा नगरपालिकास्थित श्री जनता माध्यमिक विद्यालयको नवनिर्मित भवन उद्घाटन गरिएको छ । विद्यालय भवनको वीरगंजस्थित भारतीय महावाणिज्य दूतावासका महावाणिज्यदूत देवी सहाय मीना र सुरुङ्गा नगरपालिकाकी मेयर गीता चौधरीले संयुक्त रूपमा उद्घाटन गरेका हुन् ।
विद्यालय भवन तथा सम्बन्धित पूर्वाधार उच्च प्रभाव सामुदायिक विकास परियोजना (एच.आई.सी.डी.पी.) अन्तर्गत निर्माण गरिएको हो । उक्त परियोजना सुरुङ्गा नगरपालिकामार्फत कार्यान्वयन गरिएको जनाइएको छ ।
सन् १९५१ मा स्थापना भएको श्री जनता माध्यमिक विद्यालयले हाल नर्सरी (ईसीडी) देखि स्नातक तहसम्म शिक्षा प्रदान गर्दै आएको छ । विद्यालयमा करिब ६२० विद्यार्थी अध्ययनरत रहेका छन्, जसमध्ये ३५८ जना छात्रा रहेका छन् ।
उद्घाटन कार्यक्रममा नगरपालिकाका जनप्रतिनिधि, विद्यालय व्यवस्थापन समिति तथा अन्य सरोकारवालाले भारत सरकारको सहयोगप्रति आभार व्यक्त गरेका थिए । उनीहरूले नवनिर्मित भवनले शिक्षण–सिकाइको वातावरण सुधार गर्न तथा शिक्षा क्षेत्रलाई थप सुदृढ बनाउन महत्वपूर्ण योगदान पुग्ने विश्वास व्यक्त गरे ।
कार्यक्रममा वक्ताहरूले नेपाल–भारतबीचको बहु-क्षेत्रीय सहकार्यलाई थप मजबुत बनाउन यस्ता विकास परियोजनाले महत्वपूर्ण भूमिका खेल्ने धारणा राखेका थिए ।
