वीरगंज । जिल्ला प्रहरी कार्यालय पर्साले विगो भरिभराउ मुद्दामा फरार रहेका एक प्रतिवादीलाई पक्राउ गरेको छ ।
जिल्ला प्रहरी कार्यालय पर्साका अनुसार विशेष सूचनाको आधारमा बुधबार दिउँसो करिब १२ बजे वडा प्रहरी कार्यालय श्रीपुरबाट खटिएको फैसला कार्यान्वयन टोलीले फरार प्रतिवादीलाई पक्राउ गरेको हो ।
पक्राउ पर्नेमा वीरगंज महानगरपालिका–२० निवासी ५० वर्षीय अनुप महतो रहेका छन् । उनी विगो भरिभराउ मुद्दामा पर्सा जिल्ला अदालतबाट दुई वर्ष कैद सजाय तोकिएका फरार प्रतिवादी रहेको प्रहरीले जनाएको छ ।
प्रहरीले उनलाई वीरगंज महानगरपालिका–२० स्थित लुकिछिपी बसिरहेको अवस्थामा नियन्त्रणमा लिई आवश्यक कारबाहीका लागि पर्सा जिल्ला अदालतमा बुझाएको जनाएको छ ।
यस सम्बन्धमा जानकारी दिँदै प्रहरी नायब उपरीक्षक तथा सूचना अधिकारी हरि बहादुर बस्नेतले फरार प्रतिवादी पक्राउ अभियानलाई निरन्तरता दिइने बताए ।
