वीरगंज । पर्साको बहुदरमाई नगरपालिका–९ विश्रामपुरमा मंगलबार राति झन्डै डेढ करोड रुपैयाँ बराबरका सुनचाँदीका गहना चोरी भएको छ ।
स्थानीय नन्दकिशोर पटेल, नन्दलाल पटेल, बिरजेश पटेल र राजकिशोर पटेलको घरबाट करिब २८ तोला सुन तथा डेढ किलोभन्दा बढी चाँदीका गरगहना चोरी भएको पीडित परिवारले जनाएको छ ।
घरमा प्लास्टरको काम भइरहेकाले चारै दाजुभाइका गहना एउटै स्थानमा राखिएको थियो । गहना राखिएको अल्मारी भुइँतल्लामा रहेको र परिवारका सदस्य माथिल्लो तलामा सुतिरहेका थिए ।
पीडित नन्दकिशोर पटेलका अनुसार चोरहरूले चोरी गर्नुअघि कोठाको ढोकामा बाहिरबाट चुकुल लगाएका थिए । बिहान करिब ३ बजे उठेर बाहिर निस्कन खोज्दा ढोका बाहिरबाट बन्द रहेको थाहा पाएपछि उनले आफ्नै घरमा सुतेका भाइ नन्दलाल पटेललाई फोन गरेर बोलाएका थिए । त्यसपछि ढोका खोल्दा घरमा राखिएका सुनचाँदीका गहना चोरी भएको खुलेको उनले बताए ।
घटनाबारे जानकारी पाएलगत्तै घटना स्थलमा पुगेर प्रहरीले अनुसन्धान सुरु गरेको इलाका प्रहरी कार्यालय पोखरियाका प्रमुख प्रहरी निरीक्षक प्रदीप पौडेलले जानकारी दिए ।
पीडित परिवारले चोरीमा संलग्न व्यक्तिलाई तत्काल पक्राउ गरी कानुनी कारबाही गर्न माग गरेका छन् ।
