कलैया । जिल्ला प्रहरी कार्यालय बारा अगाडि अर्धनग्न प्रदर्शन गर्ने तीन जना तेस्रोलिङ्गीलाई प्रहरीले नियन्त्रणमा लिएको छ । प्रहरी कार्यालय घेराउ गर्न पुगेका तेस्रोलिङ्गीहरूले अर्धनग्न प्रदर्शन गर्दै सडक अवरोध गरेपछि प्रहरी बल प्रयोग गरेर हटाइएको थियो ।
जिल्ला प्रहरी कार्यालय बाराका अनुसार कलैया उपमहानगरपालिका–५ निवासी महमद सरिफ मियाँ भाँडको जाहेरीका आधारमा अभद्र व्यवहार मुद्दाको अनुसन्धानका क्रममा एक जना प्रतिवादी खुश्बु भन्ने अफजल मियाँ दर्जीलाई न्यायिक हिरासतमा राखिएको थियो । उनलाई रिहा गर्नुपर्ने मागसहित सोमबार बिहान तेस्रोलिङ्गी समूहले प्रहरी कार्यालय अगाडि प्रदर्शन गरेको प्रहरीले जनाएको छ ।
जिल्ला प्रहरी कार्यालय बाराका प्रवक्ता तथा सूचना अधिकारी विजयराज पण्डित का अनुसार प्रदर्शनकारीहरूले सडक अवरुद्ध गर्नुका साथै सर्वसाधारण र सवारी साधनको आवतजावतमा समेत अवरोध पुर्याएका थिए । प्रहरी टोलीले सम्झाउने प्रयास गर्दा प्रदर्शनकारीहरूले प्रहरीमाथि गालीगलौज, अपशब्द प्रयोग तथा हातपातको प्रयास गरेको उनले बताए ।
शान्ति सुरक्षामा खलल पुगेपछि प्रहरी वरिष्ठ नायब निरीक्षक विनोद राना मगरको कमाण्डमा खटिएको टोलीले तीन जनालाई नियन्त्रणमा लिएको हो । पक्राउ पर्नेहरूमा रौतहटको दवाही गोनाही गाउँपालिका–५ की २६ वर्षीया दिव्या रानी, बाराको जीतपुरसिमरा उपमहानगरपालिका–८ की २५ वर्षीया निशा भारती तथा ५७ वर्षीया निशा देवी रहेका छन् ।
