वीरगंज । नेपाली कांग्रेसले सञ्चालन गर्दै आएको सार्वजनिक बहस मञ्च ‘ग्रिन टेबल’को संयोजनको जिम्मेवारी युवा नेता कञ्चन झालाई दिएको छ । पार्टीको केन्द्रीय नीति, अनुसन्धान तथा प्रशिक्षण प्रतिष्ठानले झालाई ग्रिन टेबल उपसमितिको संयोजक चयन गरेको हो ।
संयोजक झाले ग्रिन टेबल श्रृङ्खलालाई नीतिगत विमर्श, वैचारिक बहस तथा सार्वजनिक अन्तरक्रियाको प्रभावकारी थलोका रूपमा विकास गरिने बताएका छन् ।
नेपाली कांग्रेसभित्र वैचारिक बहस, नीतिगत सुधार तथा युवा परिचालनका क्षेत्रमा सक्रिय झा विशेषगरी युवापुस्तालाई नीति, विचार र लोकतान्त्रिक अभ्याससँग जोड्ने अभियानमा सक्रिय रहँदै आएका छन् ।
पार्टीका उपसभापति विश्वप्रकाश शर्मा नेतृत्वको केन्द्रीय नीति, अनुसन्धान तथा प्रशिक्षण प्रतिष्ठानले विभिन्न विषयगत समिति तथा सार्वजनिक संवाद कार्यक्रममार्फत पार्टीको वैचारिक आधारलाई थप मजबुत बनाउने लक्ष्य लिएको जनाएको छ ।
‘ग्रिन टेबल’ प्रतिष्ठानद्वारा सुरु गरिएको यस्तो मञ्च हो, जहाँ समसामयिक राष्ट्रिय विषय, नीति निर्माण, लोकतान्त्रिक अभ्यास, सुशासन, सामाजिक न्याय तथा सार्वजनिक सरोकारका विषयमा छलफल र अन्तरक्रिया हुने गर्दछ ।
संयोजक झाले ‘ग्रिन टेबल’ नामको अर्थ पनि प्रतीकात्मक रहेको उल्लेख गर्दै हरियो रंग नेपाली कांग्रेसको राजनीतिक पहिचान र रूख चिन्हसँग सम्बन्धित रहेको बताए । उनका अनुसार यसले देश, कृषि, वनजङ्गल, जनजीवन तथा जीवन्त सामाजिक यथार्थको प्रतिनिधित्व गर्ने सन्देश बोकेको छ ।
ग्रीन टेबल श्रृङ्खलालाई सार्वजनिक नीति र लोकतान्त्रिक संस्कृतिबीचको संवादको प्रभावकारी थलो बनाउने प्रतिबद्धता व्यक्त गर्दै उनले युवापुस्ताको सक्रिय सहभागिता, विज्ञहरूको सुझाव तथा नागरिक समाजको आवाजलाई नीतिगत बहससँग जोडिने बताए ।
‘ग्रिन टेबल’ अन्तर्गत नीतिगत सुधार आवश्यक रहेका विभिन्न समसामयिक विषयमा केन्द्रित भएर हप्तामा एक पटक विज्ञसहितको अन्तरक्रिया आयोजना गरिने जनाइएको छ । ती छलफलबाट प्राप्त निष्कर्षलाई पार्टीका नेता तथा जनप्रतिनिधिहरूको नियमित कार्यशालामार्फत थप परिष्कृत गर्दै सम्बन्धित विषयमा नीतिगत सुधारका लागि पार्टीलाई मार्गदर्शन गरिने प्रतिष्ठानले जनाएको छ ।
