वीरगंज । नेपाली कांग्रेसका सभापति गगन कुमार थापाले पर्साका दुई नेतालाई पार्टीको केन्द्रीय सदस्यमा मनोनीत गरेका छन् ।
सभापति थापाले सोमबार पार्टी विधान २०१७ (संशोधनसहित) को धारा २१ को उपधारा (१०) बमोजिम पर्साका रमेश रिजाल र अजय कुमार चौरसियालाई केन्द्रीय सदस्यमा मनोनीत गरेका हुन् ।
दुवै नेता यसअघि शेरबहादुर देउवा नेतृत्वको कार्यसमितिमा पनि केन्द्रीय सदस्य थिए । रिजाल लामो समयदेखि पार्टी संगठन तथा मधेस राजनीतिमा सक्रिय नेताका रूपमा परिचित छन् भने चौरसिया पनि पर्सा जिल्लामा कांग्रेस संगठन विस्तारमा सक्रिय रहँदै आएका छन् ।
सभापति थापाले सोमबार कुल १९ जनालाई केन्द्रीय सदस्यमा मनोनयन गरेका थिए । तीमध्ये पर्साबाट दुई नेताले अवसर पाएका हुन् ।
