वीरगंज । वीरगंजका प्रसिद्ध स्कुल गौतम माध्यमिक विद्यालयले शुल्क असुली गर्न विद्यार्थीलाई मानसिक यातना दिएकाे अभिभावकले आराेप लगाएका छन् । गौतम माविको कक्षा १० र कक्षा ८ मा अध्ययनरत छात्राहरूलाई शुल्क नबुझाएकै कारण कक्षाकोठाबाट दुई घण्टासम्म बाहिर निकालेर शिक्षकले अपमानित गरेको आरोप लागेको हो ।
वीरगंज महानगरपालिकाका वडा नं. १२, मुर्ली निवासी दिनेश कुमार गुप्ताले साेमबार वीरगंज महानगरपालिकाको शिक्षा महाशाखामा उजुरी दर्ता गराउँदै यस्तो आरोप लगाएका हुन् ।
गौतम माविको कक्षा १० मा अध्ययनरत अंकिता गुप्ता र कक्षा ८ मा अध्ययनरत आराध्या गुप्तालाई शुल्क नतिरेकै कारण कक्षाकोठाबाट बाहिर निकालेर दुई घण्टासम्म मानसिक यातना दिइएको भन्दै विद्यालय प्रशासनविरुद्ध कारबाहीको माग गरिएको छ ।
बक्यौता शुल्क असुली गर्नका लागि विद्यालय प्रशासन तथा शिक्षकले विद्यार्थीलाई कुनै पनि प्रकारले मानसिक यातना दिन नहुने नियम विपरीत गौतम स्कुलले आचरण गरेको भन्दै कानुनबमोजिम कारबाही गर्न गुप्ताले महानगरपालिकासँग माग गरेका छन् ।
गाैतम स्कुलले शुल्क नबुझाएका विद्यार्थीहरुलाई कक्षा काेठा बाहिर निकालेपछि स्कुल मै पुगेर केही अभिभावकहरु विराेध समेत गरेका थिए । स्कुलमा दुई महिनाको एडभान्स हुँदाहुँदै १ महिनाको शुल्क बाँकी भन्दै २ घण्टा विद्यार्थी निष्कासन गरेकाे एक अभिभावले आराेप लगाए । गौतम स्कुलसंग मानवता हराएको अभिभाव उनकाे भनाई थियाे ।
सरकारले एडिमिसन शुल्क, बार्षिक शुल्क नलिन र शुल्क नबढाउन निर्देशन दिएपनि त्यस विपरित स्कुलले असुली गरिरहेकाे भएपनि सम्बन्धित निकाय माैन रहेकाे गुनासाे समेत गरेका छन् ।
यस विषयमा विद्यालय प्रशासनको प्रतिक्रिया लिन स्कुलकाे वेभसाइडमा रहेकाे नम्बरमा सम्पर्क गर्न खाेज्दा फाेन नउठेका कारण सम्पर्क हुन सकेन ।
