वीरगंज । विश्व प्रेस स्वतन्त्रता दिवसका अवसरमा आइतबार वीरगंजमा प्रभातफेरी तथा कोण सभा सम्पन्न भएको छ । नेपाल पत्रकार महासंघ पर्सा शाखाको आयोजनामा गरिएको प्रभातफेरी घण्टाघरबाट सुरु भई माइस्थान, महाविरस्थान, आदर्शनगर, अलखियामठ र घडिअर्वा हुँदै पुनः घण्टाघरमै पुगेर कोण सभामा परिणत भएको थियो ।
कोण सभालाई सम्बोधन गर्दै नेपाल पत्रकार महासंघका केन्द्रीय सचिव अशोक तिवारीले सरकारबाट प्रेसमाथि भइरहेको हस्तक्षेपको कडा शब्दमा विरोध गरे । उनले निजी सञ्चारमाध्यममाथि सरकारी विज्ञापनमा लगाइएको प्रतिबन्ध तत्काल हटाउन माग गरे ।
प्रमुख अतिथि समेत रहेका सचिव तिवारीले सञ्चारमाध्यममाथि गरिएको आर्थिक नाकाबन्दीको विरोधमा महासंघ आन्दोलनरत रहेको उल्लेख गर्दै सरकार आफ्नो निर्णयबाट पछि नहटे अझ कडा आन्दोलन गर्ने चेतावनी दिए । उनले सरकारका गैरसंवैधानिक कदमविरुद्ध अन्तर्राष्ट्रिय स्तरमा समेत आवाज उठाइने र संयुक्त राष्ट्रसंघसम्म पुग्ने जानकारी गराए ।
कार्यक्रममा नेपाल पत्रकार महासंघ पर्साका अध्यक्ष ओमप्रकाश खनालले राजनीतिक दलहरू सत्तामा पुगेपछि प्रेस स्वतन्त्रता कुण्ठित गर्ने प्रवृत्ति देखिँदै आएको आरोप लगाए । उनले सत्ता बाहिर रहँदा प्रेस स्वतन्त्रताको वकालत गर्ने दलहरू सत्तामा पुगेपछि सञ्चारमाध्यमलाई नियन्त्रण गर्न खोज्ने गरेको टिप्पणी गरे ।
उनले सञ्चारमाध्यमले सत्तामा रहेका व्यक्तिहरूको स्वेच्छाचारितामाथि निगरानी राख्ने भएकाले मिडियालाई कमजोर पार्ने प्रयास भइरहेको धारणा व्यक्त गरे ।
अध्यक्ष खनालको अध्यक्षतामा सम्पन्न कार्यक्रममा प्रेस चौतारीका केन्द्रीय सदस्य विजय भण्डारी, समाजवादी प्रेस संगठन मधेश प्रदेशका अध्यक्ष मनोज पटेल, जिल्ला अध्यक्ष शम्भु कुमार सुमन, प्रेस सेन्टर पर्साका अध्यक्ष शिवनाथ यादव लगायतले मन्तव्य राखेका थिए ।
