सेढवा । आइतबार राति आएको भीषण हावाहुरीले जिराभवानी गाउँपालिका–२, सेढवाका धर्मराज राम चमारको घर पूर्ण रूपमा क्षतिग्रस्त बनाएको छ।
राति करिब ११ बजेको समयमा असिना र मुसलधारे वर्षासहित आएको हावाहुरीले उनको दुईकोठे कच्ची घरको फुसको छानो उडाउनुका साथै भित्ताहरू समेत ढालिदिएको हो। केही समयअघिसम्म आश्रय बनेको उक्त घर अहिले भग्नावशेषमा परिणत भएको छ।
घरभित्र रहेका अन्नपात, लुगाफाटा तथा भाँडाकुँडा समेत नष्ट भएका छन्। “जतिसुकै दुःख गरेर जोहो गरेको सबै एकै रातमा सकियो,” पीडित चमारले दुःखेसो पोखे।
पाँच सदस्यीय उनको परिवार हाल खुला आकाशमुनि बस्न बाध्य भएको छ। चर्को घाम, हावाहुरी र वर्षाले थप पीडा दिइरहेको उनीहरूले बताएका छन्। राति पर्नासाथ असुरक्षाको त्रास बढ्ने गरेको छ।
दैनिक ज्यालादारी गरेर जीविकोपार्जन गर्दै आएका चमार परिवारसँग न आफ्नै जमिन छ, न सुरक्षित आश्रय। प्राकृतिक विपत्तिले थपिएको यो संकटले उनीहरूलाई झन् असहाय बनाएको छ।
पीडित परिवारले अहिले सरोकारवाला निकाय तथा दातृ संस्थासँग सहयोगको अपिल गरेको छ। “अब कहाँ जाऊँ, कसरी बाँचूँ?” भन्ने प्रश्नसँगै उनीहरू राहत र पुनःस्थापनाको प्रतीक्षामा रहेका छन्।
