वीरगंज। भारत–नेपाल सीमाबाट करिब ४० किलोमिटर टाढा रहेको नेपालमा तब्लिगी जमातका गतिविधि तीव्र रूपमा बढ्न थालेपछि सुरक्षा सम्बन्धी चिन्ता बढेको छ। विशेषगरी मधेस प्रदेशका विभिन्न जिल्लामा धार्मिक गतिविधि विस्तार हुँदै जाँदा सुरक्षा निकाय सतर्क बनेका छन्।
आगामी अप्रिल २०२६ मा बारा जिल्लाको जीतपुर–सिमरा उपमहानगरपालिका–२४ हरपुर बलुवामा तीन दिने ठूलो इस्लामिक सम्मेलन (इज्तिमा) आयोजना गर्ने तयारी भइरहेको छ। उक्त कार्यक्रममा नेपाल र भारतका साथै पाकिस्तान र बंगलादेशबाट समेत सहभागी आउने सम्भावना रहेको बताइएको छ।
सुरक्षा विज्ञहरूका अनुसार यस्ता कार्यक्रममा तेस्रो मुलुकका नागरिकको सहभागिता संवेदनशील विषय भएकाले उनीहरूको आगमनबारे अग्रिम सूचना र कडाइ आवश्यक हुन्छ। खुला सीमा प्रणालीका कारण अवैध आवतजावतको जोखिम बढ्ने गएकाले नेपाल–भारत सीमामा निगरानी बढाउनुपर्ने सुझाव दिइएको छ।
यसअघि सन् २०१९ मा सप्तरीको बोदेबरसैनमा आयोजित ‘आलामी तब्लिगी इज्तिमा’ पछि तराई–मधेस क्षेत्रमा साम्प्रदायिक तनाव बढेको विश्लेषण पनि सार्वजनिक हुँदै आएको छ। सो कार्यक्रममा करिब तीन लाखभन्दा बढी मुस्लिम समुदायको सहभागिता रहेको थियो भने विदेशी नागरिकको सहभागिता रोक्न विशेष सुरक्षा व्यवस्था गरिएको थियो।
सुरक्षा निकायका अनुसार बंगलादेश र पाकिस्तानबाट प्रत्येक वर्ष साना समूहमा तब्लिगी जमात नेपाल आउने र विभिन्न मस्जिद तथा मदरसामा बस्दै धार्मिक प्रचार–प्रसार गर्ने गरेका छन् । यस्ता गतिविधिले सामाजिक सद्भावमा असर पार्न सक्ने भन्दै निगरानी बढाइएको जनाइएको छ।
हालै बंगलादेशबाट आएको आठ सदस्यीय टोली नेपालका विभिन्न जिल्लामा पुगेको र उनीहरू बारा इज्तिमामा सहभागी हुने तयारीमा रहेको स्रोतले जनाएको छ। यसैबीच भारतबाट मौलाना साद नेतृत्वको समूह पनि आउने तयारीमा रहेको बताइएको छ।
नेपालमा सन् १९८५ मा स्थापना भएको इस्लामी संघ (आईएसएन) अन्तर्गत विभिन्न समूह धार्मिक प्रचारमा सक्रिय छन्। यद्यपि, यस्ता गतिविधि शान्तिपूर्ण धार्मिक अभ्यास मात्र हो वा त्यसले सुरक्षा चुनौती निम्त्याउँछ भन्ने विषयमा बहस जारी छ।
सुरक्षा अधिकारीहरूका अनुसार कार्यक्रम शान्तिपूर्ण रूपमा सम्पन्न गराउन आवश्यक तयारी भइरहेको भए पनि विदेशी सहभागिता, खुला सीमा र विगतका घटनालाई ध्यानमा राख्दै उच्च सतर्कता अपनाइएको छ।
