वीरगंज । एसइई परीक्षा दिएका विद्यार्थी तथा अभिभावकहरूलाई लक्षित गर्दै वीरगंजमा आयोजना हुन लागेको ‘भविष्य मेला २०२६’ मा सहभागीहरूका लागि आकर्षक पुरस्कारसँगै टेक ग्याजेटमा विशेष छुटको व्यवस्था गरिएको छ।
आयोजक एड्स बी मिडियाका अनुसार, मेलामा गोला प्रथा मार्फत एक जना विद्यार्थीले मोबाइल फोन, १० जनाले एयरबड्स, १० जनाले पावर बैंक र १० जनाले स्मार्ट वाच जित्ने अवसर पाउनेछन्। कार्यक्रमको साँझ नै विजेता घोषणा गरिने जनाइएको छ।
यसैबीच, मेलामा युबन कम्पनीले आफ्ना विभिन्न टेक ग्याजेटहरू विशेष छुटमा उपलब्ध गराउने भएको छ। सहभागी विद्यार्थीहरूले एयरबड्स, पावर बैंक, इयरफोन, चार्जर र स्मार्ट वाचलगायतका सामग्री सस्तो मूल्यमा खरिद गर्न पाउनेछन्। आयोजकका अनुसार यसले विद्यार्थीहरूलाई गुणस्तरीय प्रविधि सामग्री सहज रूपमा प्राप्त गर्न सहयोग पुर्याउनेछ।
वैशाख ५ गते शनिबार (भोलि) वीरगञ्जको सिद्धार्थ दियालो होटेलमा बिहान ९ बजेदेखि साँझ ६ बजेसम्म सञ्चालन हुने एक दिने शैक्षिक तथा करियर मेलामा ८ हजारभन्दा बढी विद्यार्थी तथा अभिभावक सहभागी हुने अपेक्षा गरिएको छ।
कार्यक्रम निर्देशक नवीन कार्कीका अनुसार, “भविष्य मेला केवल शैक्षिक प्रदर्शनी मात्र नभई विद्यार्थीहरूको शैक्षिक, व्यावसायिक र व्यक्तिगत भविष्य निर्माण गर्ने परिवर्तनकारी मञ्च हो। पुरस्कार र विशेष छुटले विद्यार्थीहरूलाई थप उत्साहित बनाउने विश्वास गरेका छौं।”
मेलामा विज्ञान, व्यवस्थापन, कानुन, पत्रकारिता, इन्जिनियरिङ, चिकित्सा तथा व्यावसायिक शिक्षासम्बन्धी विषयहरूमा निःशुल्क करियर काउन्सिलिङ, विषय छनोट मार्गदर्शन, छात्रवृत्तिका अवसर तथा विभिन्न शैक्षिक संस्थाहरूको जानकारी उपलब्ध गराइनेछ। सहभागी कलेजहरूले पूर्णदेखि आंशिक छात्रवृत्ति समेत घोषणा गर्ने जनाइएको छ।
त्यस्तै, विद्यार्थीहरूका लागि निःशुल्क डिम्याट खाता, बैंक खाता, आँखा जाँच शिविर, स्टेशनरी किट, शैक्षिक किताब तथा टेक ग्याजेटसमेत उपलब्ध गराइनेछ।
गत वर्ष वीरगञ्ज टाउन हलमा सम्पन्न पहिलो संस्करणमा १० जिल्लाबाट ५ हजारभन्दा बढी विद्यार्थी सहभागी भएका थिए। दोस्रो संस्करणलाई अझ भव्य र व्यवस्थित बनाउने तयारी आयोजकले गरेको जनाएको छ।
वीरगञ्ज महानगरपालिका, प्याब्सन पर्सा, एनप्याब्सन पर्सा, हिसान पर्सा र वीरगञ्ज उद्योग वाणिज्य संघ लगायतका संस्थाहरूको सहकार्यमा आयोजना हुन लागेको मेलाले पर्सा, बारा, रौतहट लगायत आसपासका क्षेत्रका विद्यार्थीहरूलाई शैक्षिक समानता र करियर तयारीमा महत्वपूर्ण योगदान पुर्याउने अपेक्षा गरिएको छ।
एसइई दिएका विद्यार्थी, अभिभावक तथा शैक्षिक संस्थाहरूलाई मेलामा सहभागी हुन आयोजकले हार्दिक निमन्त्रणा गरेका छन्।
