वीरगंज । हरि खेतान बहुमुखी क्याम्पसका प्राध्यापक तथा कर्मचारीहरूले आफ्ना विभिन्न जायज मागहरू सम्बोधन नभएको भन्दै आन्दोलन सुरु गरेका छन्। संयुक्त संघर्ष समितिको आह्वानमा बिहीबारदेखि क्याम्पस परिसरमा सामूहिक धर्ना कार्यक्रम सुरु गरिएको हो।
समितिले जारी गरेको प्रेस विज्ञप्तिमा लामो समयदेखि उठाइँदै आएका मागप्रति क्याम्पस प्रमुख तथा व्यवस्थापन समितिले चरम उदासीनता र गैरजिम्मेवारी देखाएको आरोप लगाइएको छ। प्रशासनको निरन्तर बेवास्ताका कारण आफूहरू आन्दोलनमा उत्रिन बाध्य भएको समितिको भनाइ छ।
आन्दोलनरत पक्षले हाल लागू रहेको निजी विधान खारेज गरी सामुदायिक क्याम्पसको मर्मअनुसार नयाँ विधान लागू गर्न माग गरेका छन्। साथै, QAA नवीकरण प्रक्रिया सुरु गर्न तथा University Grants Commission (UGC) को अनुदान निरन्तरता कायम राख्नुपर्ने माग पनि अघि सारिएको छ।
त्यस्तै, प्राध्यापकहरूको तलवमान तथा सुविधा Tribhuvan University को मापदण्डअनुसार लागू गर्न, वार्षिक ग्रेड, पदोन्नति, सञ्चय कोष तथा सामाजिक सुरक्षा कोषमा आबद्ध गराउनुपर्ने माग गरिएको छ।
यसैगरी, सेवा निवृत्तिपछि उपदानको व्यवस्था, प्याकेज तथा ज्यालादारी प्राध्यापकलाई तलवमा रूपान्तरण, स्थायी नियुक्ति, तलवमा समानता, सन्तानको निःशुल्क शिक्षा तथा संचित बिरामी बिदाको रकम उपलब्ध गराउनुपर्ने लगायतका १७ बुँदे माग समितिले प्रस्तुत गरेको छ। क्याम्पस प्रमुख किशोरी रायले नैतिकताको आधारमा राजीनामा दिनुपर्ने माग पनि गरिएको छ।
संयुक्त संघर्ष समितिले मागहरू यथाशीघ्र सम्बोधन नगरिए रिले अनसनदेखि आमरण अनसनसम्मका कडा आन्दोलनका कार्यक्रम अघि बढाउने चेतावनी दिएको छ। आन्दोलनबाट उत्पन्न हुने सम्पूर्ण परिस्थितिको जिम्मेवारी क्याम्पस प्रशासनले नै वहन गर्नुपर्ने समितिको भनाइ छ।
समितिले आफ्नो आन्दोलनप्रति समर्थन जनाउन सरोकारवाला निकाय, अभिभावक, विद्यार्थी, नागरिक समाज तथा सञ्चारकर्मीहरूलाई अपिलसमेत गरेको छ।
