वीरगंज । पर्सा र बाराका गाउँगाउँमा सामूहिक रूपमा नवरात्र व्रत तथा पूजा गर्ने भक्तजनको संख्या बढ्दै गएको छ । पछिल्ला केही वर्षयता गाउँमा सामूहिक पण्डाल निर्माण गरी कलश स्थापना गरेर सामूहिक रूपमा नवरात्र मनाउने परम्परा विस्तार हुँदै गएको हो ।
बडादशैंको पहिलो दिन घटस्थापनाको अवसरमा आइतबार पर्सा र बाराका विभिन्न गाउँमा बाजागाजासहित कलश यात्रा निकालिएको छ । नवरात्र व्रत बस्ने महिला तथा भक्तजनहरू कलश यात्रामा सहभागी भई गाउँनजिकका जलाशयबाट जल भरेर धार्मिक विधिअनुसार कलश स्थापना गरेका छन् ।
गाउँगाउँमा आयोजना गरिएका कलश यात्रामा महिला तथा व्रतालुहरूको उत्साहजनक सहभागिता देखिएको थियो । बाजागाजा, भजनकीर्तन र धार्मिक जयघोषसहित निकालिएका यात्राले गाउँको वातावरण भक्तिमय बनेको थियो ।
सामूहिक रूपमा आयोजना गरिएका धार्मिक कार्यक्रमले स्थानीयस्तरमा आपसी सद्भाव, एकता र सांस्कृतिक परम्परालाई समेत बलियो बनाउँदै लगेको स्थानीयहरूको भनाइ छ ।
नवरात्रको नौ दिनसम्म देवी दुर्गाका विभिन्न स्वरूपको पूजा–आराधना गरिने भएकाले भक्तजनहरूले व्रत, पूजापाठ तथा भजनकीर्तन गरी धार्मिक अनुष्ठान गर्ने गर्छन् । पछिल्लो समय गाउँगाउँमा सामूहिक रूपमा नवरात्र मनाउने चलन बढ्दै जाँदा स्थानीय धार्मिक तथा सांस्कृतिक गतिविधिमा समेत रौनक थपिएको छ ।
