सेढवा । पर्सा राष्ट्रिय निकुञ्जभित्र अवस्थित दुधेश्वर महादेव मन्दिरमा बैशाख कृष्णपक्ष त्रयोदशीको अवसरमा लाग्ने वार्षिक मेला आज सम्पन्न भएको छ। हरेक वर्षझैँ यस वर्ष पनि मेलामा स्वदेशी तथा विदेशी श्रद्धालु भक्तजनहरूको उल्लेखनीय उपस्थिति देखिएको छ।
मानव बस्तीबाट करिब १७ किलोमिटर टाढा, जंगलको बीचमा रहेको रामभौरी भाठास्थित मन्दिरमा दर्शन गर्न बिहानैदेखि भक्तजनहरूको घुइँचो लागेको थियो। विगत तीन दिनदेखि मेला भर्न गएका व्यापारी, पसले तथा भक्तजनहरू अहिले जंगलबाट फर्किन थालेका छन्। पटेर्वासुगौली गाउँपालिका–४ का मुकेश गौरोका अनुसार ट्र्याक्टर, जीप, कार तथा मोटरसाइकलमार्फत मेला जानेहरूको चाप अत्यधिक रहेको थियो।
दुधेश्वर महादेव मन्दिर निर्माण तथा संरक्षण समितिका अध्यक्ष अलखदेव प्रसाद थारुले यस वर्ष अघिल्ला वर्षहरूको तुलनामा भक्तजनहरूको संख्या उल्लेखनीय रूपमा बढेको जानकारी दिए। किसानहरूले गहुँबाली समयमै भित्र्याइसकेकाले फुर्सदको समय मिलेकाले पनि मेलामा भीड बढेको उनले बताए। यस वर्ष ३० भन्दा बढी अष्टजाम समेत आयोजना गरिएको थियो।
निकुञ्ज प्रशासनले जंगल प्रवेशका लागि साँझ ६ बजेसम्म समय तोकेको भए पनि यात्रुहरूको सुविधालाई ध्यानमा राख्दै ७ बजेसम्म आवागमनको अनुमति दिइएको समितिले जनाएको छ। सम्भावित भीड व्यवस्थापनका लागि जनपद प्रहरी तथा स्वयंसेवकहरू परिचालन गरिएको थियो।
मन्दिरमा दर्शन गर्न पर्सा, बारा, मकवानपुर, रौतहट, चितवन लगायतका जिल्लाबाट साथै भारतका बिहार र उत्तर प्रदेशबाट समेत हजारौं भक्तजनहरू आउने गरेका छन्। तर भारतीय सुरक्षाकर्मीहरूले ठोरी र इनरवा नाकाबाट चारचक्के सवारीसाधनलाई मात्र अनुमति दिने गरेको गुनासो समेत आएको छ।
यस्तै, मन्दिर आवागमनका लागि विभिन्न मार्गहरू उपलब्ध भए पनि निकुञ्ज प्रशासनले चारभैया नाका मात्र सञ्चालनमा ल्याउँदा उक्त क्षेत्रमा अत्यधिक भीडभाड र ट्राफिक जाम भएको ठोरी गाउँपालिका–५ का देवीप्रसाद दहालले बताए। यसले गर्दा भक्तजनहरूले आवतजावतमा सास्ती खेप्नुपरेको उनको भनाइ छ।
मध्यवर्ती क्षेत्रका गडुवालाईन, सुवर्णपुर, बाघमोर्चा लगायतका सामुदायिक वन क्षेत्रका चौकहरूमा समेत भक्तजनहरूको उल्लेखनीय भीड देखिएको थियो।
