वीरगंज । पर्साको कालिकामाई गाउँपालिकामा गर्भवती तथा सुत्केरी महिलाहरूका लागि निःशुल्क भिडियो एक्स–रे (USG) स्क्रिनिङ सेवा सुरु गरिएको छ।
एक कार्यक्रमबीच गाउँपालिका अध्यक्ष बशिष्ट कुमार गुप्ताले उक्त सेवाको शुभारम्भ गरेका हुन् । सोही कार्यक्रम अन्तर्गत सोमबार बिरन्चीबार्वा स्वास्थ्य चौकीमा २५ जना गर्भवती तथा सुत्केरी महिलाले भिडियो एक्स–रे सेवा लिएका छन्।
गाउँपालिका अध्यक्ष गुप्ताका अनुसार गाउँपालिका अन्तर्गत रहेका सबै स्वास्थ्य चौकीहरूमा गर्भवती तथा सुत्केरी आमाहरूका लागि भिडियो एक्स–रे (USG) स्क्रिनिङ सेवा निःशुल्क रूपमा सञ्चालन गरिने व्यवस्था गरिएको छ।
गाउँपालिकाबाट जारी सार्वजनिक सूचना अनुसार अब सबै स्वास्थ्य चौकीहरूमा यो सेवा नियमित रूपमा सञ्चालन हुने जनाएको छ।
उक्त कार्यक्रममार्फत गर्भवती तथा सुत्केरी सेवाग्राहीहरूलाई लक्षित गरी भिडियो एक्स–रे सेवा प्रदान गरिनेछ। स्थानीय तहबाट स्वास्थ्य सेवाको पहुँच विस्तार गर्दै मातृ स्वास्थ्य सुधार गर्ने उद्देश्यले यस्तो सेवा सञ्चालन गरिएको जनाइएको छ।
गाउँपालिकाले यस्ता कार्यक्रममार्फत ग्रामीण क्षेत्रमा गुणस्तरीय स्वास्थ्य सेवा उपलब्ध गराउँदै आम नागरिकको स्वास्थ्य अवस्थालाई सुदृढ बनाउने लक्ष्य राखेको जनाएको छ।
