सेढवा । पर्सा जिल्लाको जिराभवानी गाउँपालिका वडा नं ४ का वडाध्यक्ष राजेश्वर दास थारुले आफ्नो भाउजु सुगान्धी देवीमाथि कुटपिट तथा दुर्व्यवहार गरेको आरोप अस्वीकार गरेका छन्।
वडाध्यक्ष थारुले सुपौलीमा पत्रकार सम्मेलन गर्दै केही मिडिया तथा सामाजिक सञ्जालमा आफूलाई जोडेर समाचार प्रसारण गरिएकोप्रति आपत्ति जनाएका हुन्। उनले यस्ता समाचारले आफ्नो प्रतिष्ठामा गम्भीर असर पुगेको दाबी गर्दै सत्यतथ्य बुझेर मात्र समाचार प्रकाशन गर्न सञ्चारकर्मीलाई आग्रह गरे।
उनका अनुसार शनिबार दिउँसो भाउजु सुगान्धी देवी र उनका जेठा छोरा कृष्ण दास थारुबीच खेतको बाली बुझ्ने विषयमा विवाद भएको थियो। उक्त विवादमा आफ्नो कुनै संलग्नता नरहेको उनले स्पष्ट पारे। “घटना भएको बेला म धान खेतमा सिँचाइ गरिरहेको थिएँ,” उनले भने, “सहभागिता नै नभएको घटनामा आरोप लगाउनु गलत हो।”
कार्यक्रममा वडा सचिव महेश राउत कुर्मीले करिब डेढ बिघा जग्गाको बालीसम्बन्धी विवाद लामो समयदेखि चल्दै आएको जानकारी दिए। उनका अनुसार गत कार्तिक महिनामा धान बाली बुझ्ने विषयमा विवाद हुँदा प्रहरी चौकी सुपौलीमा आमा सुगान्धी देवीले धानबाली बुझ्ने र छोरा कृष्ण दास थारु तथा उमेश दास थारुले गहुँबाली बुझ्ने सहमति भएको थियो।
तर हाल गहुँबाली बुझ्ने क्रममा सुगान्धी देवीले उक्त बाली पनि आफ्नो दाबी गरेपछि पुनः विवाद उत्पन्न भएको कुर्मीले बताए। विवादपछि बाली यथास्थितिमा छाडिएको छ भने जग्गा अंशसम्बन्धी मुद्दा विगत चार वर्षदेखि अदालतमा विचाराधीन रहेको छ।
स्थानीय लक्ष्मी दास थारुका दुई छोरा ब्रह्मन्द दास थारु (जेठो) र राजेश्वर दास थारु (कान्छो) रहेका छन् । उनीहरू वर्षौंअघि अंशबन्डा गरी अलग बस्दै आएका छन्। ब्रह्मन्द दास थारुको पहिलो श्रीमतीबाट दुई छोरा—कृष्ण दास थारु र उमेश दास थारु—रहेका छन् भने कान्छी श्रीमती सुगान्धी देवीबाट तीन छोरी र एक छोरा रहेका छन्। परिवारबीचको यही अंश तथा बाली सम्बन्धी विवादका कारण पछिल्लो घटना भएको बताइएको छ।
