:वीरगंज । नेपाल कावेरी एकेडेमीले यूकेजी कक्षाका विद्यार्थीहरूको दीक्षान्त समारोह भव्य रूपमा सम्पन्न गरेको छ।
साना कक्षाका विद्यार्थीहरूको उपलब्धिलाई सम्मान गर्दै उनीहरूलाई शैक्षिक यात्राको नयाँ चरणतर्फ उत्साहजनक रूपमा अग्रसर गराउने उद्देश्यले कार्यक्रम आयोजना गरिएको विद्यालयले जनाएको छ।
कार्यक्रममा विद्यालयका निर्देशक श्याम तुल्स्यान प्रमुख अतिथिका रूपमा उपस्थित भई दीक्षित विद्यार्थीहरूलाई प्रमाणपत्र प्रदान गर्दै उनीहरूको उज्ज्वल भविष्यको कामना व्यक्त गरे। कार्यक्रममा निर्देशक श्रीमती आयुषी तुल्स्यानको समेत उपस्थिति रहेको थियो।
समारोहका क्रममा साना बालबालिकाहरूले आत्मविश्वासका साथ स्वागत मन्तव्य प्रस्तुत गर्नुका साथै विभिन्न सांस्कृतिक कार्यक्रममार्फत आफ्नो प्रतिभा देखाएका थिए। उनीहरूको प्रस्तुतीले कार्यक्रममा उपस्थित अभिभावक तथा अतिथिहरूलाई मन्त्रमुग्ध बनाएको थियो।
कार्यक्रम विद्यालयका प्रिन्सिपल दिलीप गुप्ता, उप-प्रिन्सिपल प्रफुल सर्राफ तथा संयोजक सलोनी रौनियारको नेतृत्वमा सफलतापूर्वक सञ्चालन गरिएको थियो।
अभिभावकहरूले विद्यालयको समग्र विकासप्रतिको प्रतिबद्धताको प्रशंसा गर्दै सकारात्मक प्रतिक्रिया दिएका थिए। साथै कार्यक्रममा नयाँ शैक्षिक नीति, रणनीति तथा प्रि-प्राइमरीबाट प्राइमरी तहमा विद्यार्थीहरूको रूपान्तरणसम्बन्धी विषयमा समेत छलफल गरिएको थियो।
विद्यालय प्रशासनका अनुसार समारोह विद्यार्थीहरूको शैक्षिक प्रगति, आत्मविश्वास र समग्र विकासको खुसीयालीका साथ सम्पन्न भएको हो।
