वीरगंज । कुखुरा फर्ममा काम गर्ने एक कामदारमाथि निर्घात कुटपिट गर्ने साहुलाई प्रहरीले पक्राउ गरेको छ। कामदारमाथि कुटपिट गरेको आरोपमा वीरगंज–१७ निवासी ३० वर्षीय सकिन लाल देवानलाई नियन्त्रणमा लिइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिएका छन्।
परवानीपुर प्रहरी चौकी नजिक रहेको “साबिर फ्रेस हाउस एण्ड सप्लायर्स” का सञ्चालक देवानले आफ्नै पसलमा कार्यरत २० वर्षीय कामदार नुर आलम देवानलाई लठ्ठीले कुटपिट गरेको भिडियो सामाजिक सञ्जालमा भाइरल भएपछि प्रहरीले उनलाई पक्राउ गरेको हो।
भाइरल भिडियोमा साहु देवानले कामदार नुरले पसलबाट कुखुरा चोरी गरेर बिक्री गरेको आरोप लगाउँदै निर्घात रूपमा कुटपिट गरिरहेको देखिन्छ। उक्त घटना सार्वजनिक भएसँगै चौतर्फी आलोचना भएको छ।
मानव अधिकारविरुद्धको कार्य भएको भन्दै सरोकारवालाहरूले दोषीमाथि कडा कारबाहीको माग गरेका छन् । प्रहरीले घटनाबारे थप अनुसन्धान गरिरहेको जनाएको छ।
