वीरगंज । नेशनल इन्जिनियर एसोसिएसन नेपाल पर्साले राष्ट्रिय स्वतन्त्र पार्टीका मधेस प्रदेश सभापति एवं प्रतिनिधि सभा सदस्य इन्जिनियर तापेश्वर यादवलाई सम्मान गरेको छ।
एसोसिएसनले आफ्ना केन्द्रीय महासचिव समेत रहेका यादवलाई वीरगंजमा आयोजित एक कार्यक्रमका बीच सम्मान गरेको हो। सिरहा क्षेत्र नम्बर ४ बाट निर्वाचित यादवले इन्जिनियरिङ पेशाबाट राजनीति क्षेत्रमा महत्वपूर्ण उचाइ हासिल गर्दै अघि बढिरहेको उल्लेख गर्दै इन्जिनियरहरूको हक–अधिकारका लागि सधैं आवाज उठाउने प्रतिबद्धता व्यक्त गरे।
कार्यक्रममा एसोसिएसन पर्साका अध्यक्ष शिवचन्द्र यादवले इन्जिनियर तापेश्वर यादवले स्वतन्त्र रूपमा इन्जिनियरहरूको संगठन निर्माण गर्दै राजनीतिक क्षेत्रमा सक्रिय भूमिका निर्वाह गरिरहेकाले सम्मान गरिएको जानकारी दिए। उनका अनुसार देशभर रहेका स्वतन्त्र तथा सक्रिय इन्जिनियरहरूलाई एकताबद्ध गर्न यादवले महत्वपूर्ण योगदान दिएका छन्।
यादवले भदौ २३ र २४ को जेनजी आन्दोलनपछिको राजनीतिक परिवेश र वर्तमान जनचाहनाअनुसार युवाहरूको प्रतिनिधिसभामा बढ्दो सहभागिताले देश निर्माणमा सकारात्मक प्रभाव पार्ने विश्वास व्यक्त गरे।
