वीरगंज । वीरगंज महानगरपालिका वडा नं. ८ को नवनिर्मित वडा कार्यालय भवन शुक्रबार एक समारोहका बीच उद्घाटन गरिएको छ। भवनको उद्घाटन वीरगञ्ज महानगरपालिकाका प्रमुख राजेशमान सिंहले गर्नुभएको हो।
महानगरपालिकाले आर्थिक वर्ष २०७९/८० मा टेण्डर आह्वान गरी निर्माण प्रक्रिया सुरु गरेको उक्त भवन एसडी कन्स्ट्रक्सनले करिब ७९ लाख रुपैयाँको लागतमा निर्माण सम्पन्न गरेको हो। भवन तयार भएसँगै वडा कार्यालयले अब आफ्नै सुविधासम्पन्न भवनबाट सेवा प्रवाह सुरु गरेको छ।
दुई तले पक्की संरचनामा निर्माण गरिएको यस भवनले वडा कार्यालयको सेवा प्रणालीलाई थप व्यवस्थित बनाउने अपेक्षा गरिएको छ। यसअघि वडा कार्यालयको आफ्नै भवन नभएकाले विद्यालयको कोठाबाट सेवा सञ्चालन हुँदै आएको थियो, जसका कारण सेवाग्राहीले विभिन्न समस्या भोग्दै आएका थिए।
अब भने नयाँ भवन सञ्चालनमा आएपछि सेवा प्रवाह छिटो, सहज र नागरिकमैत्री हुने विश्वास लिइएको छ।
उद्घाटन समारोहमा बोल्दै महानगर प्रमुख राजेशमान सिंहले स्थानीय तहको सेवा प्रवाहलाई प्रभावकारी बनाउन भौतिक पूर्वाधारको विकास अत्यावश्यक रहेको उल्लेख गर्नुभयो। उहाँले नयाँ भवनले वडा स्तरका सेवाहरूलाई अझ सुलभ बनाउने विश्वास व्यक्त गर्दै आगामी दिनमा यस्ता पूर्वाधार निर्माणलाई निरन्तरता दिने प्रतिबद्धता जनाउनुभयो।
कार्यक्रममा महानगरपालिकाका प्रमुख प्रशासकीय अधिकृत अरविन्द लाल कर्ण, विभिन्न वडाका अध्यक्षहरू, स्थानीय बुद्धिजीवी, समाजसेवी तथा सर्वसाधारणको उल्लेखनीय उपस्थिति रहेको थियो।
