वीरगंज । पर्सा, बारा, रौतहटलगायत आसपासका जिल्लाका माध्यमिक शिक्षा परीक्षा (एसइई) दिएका विद्यार्थी तथा अभिभावकलाई लक्षित गर्दै ‘भविष्य मेला २०२६’ को दोस्रो संस्करण आयोजना हुने भएको छ।
गत वर्षको सफलतापछि यसपटक मेला अझ भव्य, व्यवस्थित र मर्यादित रूपमा सञ्चालन गर्ने लक्ष्यसहित आगामी वैशाख ५ गते शनिवार वीरगञ्जस्थित सिद्धार्थ दियालो होटलमा बिहान ९ बजेदेखि साँझ ६ बजेसम्म मेला आयोजना गरिनेछ।
वीरगञ्जकै एड्स बी मिडियाको आयोजनामा हुने एकदिने शैक्षिक तथा करियर मेलामा आठ हजारभन्दा बढी विद्यार्थी तथा अभिभावकको सहभागिता रहने अपेक्षा गरिएको छ। कार्यक्रम निर्देशक नवीन कार्कीका अनुसार ‘भविष्य मेला’ केवल शैक्षिक प्रदर्शनी नभई विद्यार्थीहरूको शैक्षिक, व्यावसायिक र व्यक्तिगत भविष्य निर्माण गर्ने एक परिवर्तनकारी मञ्च हो।
उनले मेलाले वीरगञ्ज र आसपासका क्षेत्रमा शैक्षिक जागरूकता अभिवृद्धि गर्नुका साथै सामाजिक–आर्थिक विकासमा टेवा पुर्याउने विश्वास व्यक्त गरे। मेलाको मुख्य उद्देश्य ग्रामीण तथा सहरी क्षेत्रका विद्यार्थीलाई विज्ञान, व्यवस्थापन, कानुन, पत्रकारिता, इन्जिनियरिङ, चिकित्सा तथा विभिन्न प्राविधिक शिक्षाका क्षेत्रबारे विस्तृत जानकारी प्रदान गर्नु रहेको छ।
मेलामा विद्यार्थीहरूलाई आफ्नो रुचि, क्षमता, पारिवारिक आर्थिक अवस्था र दीर्घकालीन लक्ष्यअनुसार विषय तथा कलेज छनोट गर्न विशेषज्ञमार्फत मार्गदर्शन दिइनेछ। यसले शैक्षिक समानता प्रवर्द्धन गर्नुका साथै करियर निर्माणमा सहयोग पुर्याउने आयोजकको दाबी छ।
पहिलो संस्करण गत वर्ष वीरगञ्ज नगर सभागृह (टाउन हल) मा आयोजना भएको थियो, जहाँ १० जिल्लाबाट ५ हजारभन्दा बढी विद्यार्थी सहभागी भएका थिए। उक्त मेलामा २८ वटा कलेजले स्टल राखी विद्यार्थीलाई परामर्श, छात्रवृत्ति, खर्च र रोजगारीका अवसरबारे जानकारी दिएका थिए।
यस वर्षको संस्करणमा थप आकर्षणहरू समेटिएको छ। उत्कृष्ट कलेज छनोट गर्ने अवसरसँगै एक जना विद्यार्थीले मोबाइल फोन, पाँच जनाले एयरबड्स र १० जनाले पावर बैंक तथा हाते घडी जित्ने अवसर पाउनेछन्। सहभागी कलेजहरूले पूर्णदेखि आंशिक छात्रवृत्तिसमेत उपलब्ध गराउनेछन् भने निःशुल्क करियर काउन्सिलिङ सेवा पनि प्रदान गरिनेछ।
काउन्सिलिङमार्फत विद्यार्थीहरूले उपयुक्त विषय छनोट, भविष्यका रोजगारीका अवसर, छात्रवृत्ति तथा आफ्नो क्षमता अनुसारको अध्ययन मार्गबारे विशेषज्ञबाट व्यक्तिगत सुझाव पाउनेछन्।
मेलामा शैक्षिक संस्थाहरूले आफ्ना शैक्षिक कार्यक्रम, प्रयोगशाला, पुस्तकालय, खेलकुद, उद्योग साझेदारी, अन्तर्राष्ट्रिय आदानप्रदान तथा छात्रवृत्ति योजनाहरू प्रस्तुत गर्ने अवसर पाउनेछन्। साथै, करियर कार्यशाला, प्रत्यक्ष प्रदर्शनी र पूर्व विद्यार्थीका सफलताका कथामार्फत संस्थाहरूले आफ्नो विश्वसनीयता प्रस्तुत गर्न सक्नेछन्।
विद्यार्थी तथा अभिभावकका लागि मेलामा विभिन्न निःशुल्क सुविधाहरू पनि उपलब्ध गराइनेछ। आयोजकका अनुसार निःशुल्क डिम्याट खाता, बैंक खाता, आँखा जाँच शिविर तथा नेपाल टेलिकमको सिम कार्ड वितरण गरिनेछ। यसका साथै स्टेशनरी किट, शैक्षिक पुस्तक र विभिन्न टेक ग्याजेटसमेत प्रदान गरिनेछ।
वीरगञ्ज महानगरपालिका, प्याब्सन पर्सा, एनप्याब्सन पर्सा, हिसान पर्सा तथा वीरगञ्ज उद्योग वाणिज्य संघलगायत संस्थाहरूको सहकार्यमा मेला आयोजना हुन लागेको हो।
आयोजक नवीन कार्कीले दोस्रो संस्करणलाई अझ प्रभावकारी बनाउने प्रतिबद्धता व्यक्त गर्दै यसलाई युवाको उज्ज्वल भविष्यतर्फ उन्मुख गर्ने अभियानका रूपमा विकास गर्ने बताएका छन्।
मेलामा सहभागी हुन एसइई दिएका विद्यार्थी, अभिभावक, शैक्षिक संस्था तथा स्थानीय व्यवसायीलाई आयोजकले हार्दिक निमन्त्रणा गरेका छन्।
