वीरगंज । वीरगंजस्थित नारायणी अस्पताललाई मेडिकल कलेजको रूपमा विकास गर्ने पहल तीव्र पारिएको छ। यसैक्रममा अस्पतालका मेडिकल सुपरिटेन्डेन्ट डा. चितरन्जन साहले दुई दिनअघि स्वास्थ्य तथा जनसंख्या मन्त्री निशा मेहतासँग भेट गरी अस्पतालको स्तरोन्नति विषयमा छलफल गरेका थिए।
भेटका क्रममा नारायणी अस्पताललाई मेडिकल कलेजमा रूपान्तरण गर्ने सम्भावना, आवश्यक पूर्वाधार, जनशक्ति व्यवस्थापन तथा शैक्षिक कार्यक्रम सञ्चालनका विषयमा प्रारम्भिक छलफल भएको जनाइएको छ। उक्त छलफलमा सहभागी जेन–जि युवा अर्जुन साहका अनुसार अस्पताललाई प्रदेशकै प्रमुख शैक्षिक तथा स्वास्थ्य केन्द्रको रूपमा विकास गर्ने लक्ष्यसहित पहल अघि बढाइएको हो ।
यसैबीच मंगलबार शिक्षा, विज्ञान तथा प्रविधि मन्त्री सस्मित पोखरेलसँग समेत पुनः उच्चस्तरीय छलफल गरिएको छ। उक्त छलफलमा राजर्षि जनक विश्वविद्यालयका उपकुलपति अमर यादवको समेत सहभागिता रहेको थियो।
छलफलमा अस्पताललाई मेडिकल कलेजमा रूपान्तरण गर्न आवश्यक प्रक्रिया अगाडि बढाउने, सम्बन्धनको विषय, शैक्षिक मापदण्ड पूरा गर्ने तथा बजेट व्यवस्थापनका विषयमा विस्तृत रूपमा कुराकानी भएको बताइएको छ।
सरोकारवालाहरूका अनुसार नारायणी अस्पताललाई मेडिकल कलेजमा स्तरोन्नति गर्न सके मधेस प्रदेशका विद्यार्थीहरूले आफ्नै क्षेत्रमा गुणस्तरीय चिकित्साशास्त्र अध्ययन गर्ने अवसर पाउनेछन् । साथै, यसबाट दक्ष जनशक्ति उत्पादन हुनुका साथै स्वास्थ्य सेवामा समेत उल्लेखनीय सुधार आउने अपेक्षा गरिएको छ।
स्थानीय तह, सरोकारवाला निकाय तथा युवाहरूले समेत यस पहलप्रति सकारात्मक प्रतिक्रिया जनाउँदै आवश्यक सहयोग गर्ने प्रतिबद्धता व्यक्त गरेका छन्। आगामी दिनमा विस्तृत अध्ययन, पूर्वाधार विकास, कानुनी प्रक्रिया तथा स्रोत व्यवस्थापनलाई प्राथमिकतामा राखेर योजना कार्यान्वयनतर्फ अघि बढाइने जनाइएको छ।
