वीरगंज । पर्साको पोखरिया नगरपालिकामा आय–व्यय र कर्मचारी तलबकाे विषयमा विवाद बढेको छ । मंगलबार नगरपालिकाका जनप्रतिनिधिहरूले प्रमुख प्रशासकीय अधिकृत कौशल कुमार झालाई ज्ञापनपत्र बुझाउँदै ०८०/०८१ देखि हालसम्मको इन्धन खर्च, पोषण शिक्षा र स्वास्थ्य क्षेत्रमा भएको खर्च विवरण सार्वजनिक गर्न माग गरेका छन्।
जनप्रतिनिधिहरूले कर्मचारीहरूको बाँकी रहेकाे ११ महिनाको तलब र आफ्ना सेवा–सुविधा पठाउनुपर्ने समेत जोड दिएका छन्। केही वडाध्यक्ष सहितका जनप्रतिनिधिहरुले तीन दिनभित्र हिसाब–किताब नबताए पालिकामा तालाबन्दी गर्ने चेतावनी पनि दिएका छन् । ज्ञापनपत्र बुझ्दै प्रमुख प्रशासकीय अधिकृत झाले सम्बन्धित शाखाबाट आवश्यक कागजात उपलब्ध गराउने प्रतिबद्धता जनाए।
ज्ञापन पत्र बुझाउने टाेलीमा वडाध्यक्ष लक्ष्मण शाह कानु, परमानन्द पटेल, नौसाद आलम, वडा सदस्य लगायतकाे जनप्रतिनिधिहरुकाे सहभागिता रहेकाे थियाे ।
त्यसैगरी, नगरपालिकाका कर्मचारीहरूले पनि स्थायी कर्मचारीको पाँच महिना र अस्थायी कर्मचारीको ११ महिनादेखिको तलब तुरुन्त उपलब्ध गराउन माग गरेका छन् । तलब नपठाइएमा प्रमुख प्रशासकीय अधिकृत र लेखा शाखा प्रमुखलाई घेराउ गर्ने चेतावनी कर्मचारीहरूले दिएका छन्।
यसैबिच, अख्तियार दुरुपयोग अनुसन्धान आयोगको टोलीले मंगलबार पोखरिया नगरपालिका कार्यालयमा छापामारी गरेकाे समाचार समेत प्राप्त भएकाे छ । अख्तियारकाे टाेलीले छापा हानी केही योजना सम्बन्धी कागजात नियन्त्रणमा लिएर आवश्यक जानकारी संकलन गरेको वताइएकाे छ ।
