काठमाडौं । नेपाली कांग्रेसका सभापति गगनकुमार थापाले पार्टीको १५औँ महाधिवेशन आगामी वर्ष भदौ २४ देखि २६ गतेसम्म गर्ने प्रस्ताव केन्द्रीय समितिमा पेश गर्नुभएको छ।
पार्टी केन्द्रीय कार्यालय सानेपामा सुरु भएको केन्द्रीय कार्यसमितिको बैठकमा सभापति थापाले महाधिवेशन तयारीको विस्तृत कार्यतालिका प्रस्तुत गर्नुभएको हो। प्रस्तावित कार्यतालिकाअनुसार, क्रियाशील सदस्यता वितरण चैत २१ गतेदेखि चैत मसान्तसम्म विशेष अभियान मार्फत अद्यावधिक गरिने छ। २०८३ वैशाख १ देखि वैशाख मसान्तसम्म सबै ६ हजार ७४३ वटै वडामा क्रियाशील सदस्यता वितरण र अद्यावधिक गर्ने योजना रहेको छ।
जेठ मसान्तसम्म सदस्यता विवरण केन्द्रमा पठाइने र असार १५ गतेसम्म आवश्यक छानबिन गरेर टुङ्ग्याइने कार्ययोजना तय गरिएको छ। असार मसान्तसम्म अद्यावधिक क्रियाशील सदस्यको नामावली केन्द्रीय निर्वाचन समितिलाई बुझाउने, साउन ६ गते गाउँ/नगर अधिवेशन सम्पन्न गर्ने प्रस्ताव गरिएको छ।
अन्य कार्यक्रम अनुसार, साउन १२ गते गाउँ/नगर अधिवेशन, साउन २३ गते प्रदेशसभा क्षेत्रीय अधिवेशन, साउन ३० गते प्रतिनिधिसभा क्षेत्रीय अधिवेशन, भदौ ६–७ गते जिल्ला अधिवेशन, भदौ १५–१६ गते प्रदेश अधिवेशन र भदौ २४–२६ गते केन्द्रीय महाधिवेशन हुने प्रस्ताव छ।
