वीरगंज । पर्साको जगरनाथपुर गाउँपालिकाले वडा नं. ५ धर्मपुर टोलकी महिला दलित वडा सदस्य गेनी देवी दुसादको असामयिक निधनप्रति शोक व्यक्त गर्दै एक दिन शोक विदा घोषणा गरेको छ।
गाउँपालिकाका प्रमुख प्रशासकीय अधिकृत सन्देश कुमार यादवद्वारा जारी सूचनाअनुसार मंगलबार निधन भएकी दुसादको मृत्युले समग्र गाउँपालिकालाई स्तब्ध बनाएको उल्लेख गरिएको छ।
गाउँपालिकाले दिवंगत आत्माको चिरशान्तिको कामना गर्दै शोकाकुल परिवारप्रति गहिरो समवेदना प्रकट गरेको छ। साथै, यस दुःखद घडीमा परिवारलाई धैर्य धारण गर्ने शक्ति प्राप्त होस् भन्ने कामना पनि गरिएको छ।
उक्त शोकमा चैत १२ गते बुधबार गाउँपालिकाअन्तर्गत अत्यावश्यक सेवा तथा शैक्षिक संस्थाबाहेकका सबै कार्यालयहरू बन्द रहने जनाइएको छ।
यसैबिच गाउँपालिका अध्यक्ष श्रीकान्त प्रसाद यादवले पनि वडा सदस्य दुसादकाे निधनमा श्रद्धाञ्जली तथा समवेदना प्रकट गरेका छन् ।
