वीरगंज । मधेश प्रदेशका ३२ वटा निर्वाचन क्षेत्रमा पराजित भएका नेकपा एमालेका उम्मेदवारमध्ये पर्साका उम्मेदवारहरूले तुलनात्मक रूपमा बढी मत ल्याएका छन्।
एमालेका एक नेताका अनुसार पर्सा निर्वाचन क्षेत्र नं. १ का एमाले उम्मेदवार प्रदीप यादवले मधेश प्रदेशभरिका एमाले उम्मेदवारमध्ये सबैभन्दा बढी १३ हजार ३० मत प्राप्त गरेका थिए । यद्यपि, उनी पराजित भए । उक्त क्षेत्रमा राष्ट्रिय स्वतन्त्र पार्टी (रास्वपा) का उम्मेदवार विजयी भएका थिए ।
त्यसैगरी, नेपाली कांग्रेसका उम्मेदवार अनिल रुङ्गटाले ११ हजार ८ सय ८५ मत प्राप्त गर्दै तेस्रो स्थानमा सीमित भएका थिए।
देशभर ‘घण्टी’ चुनाव चिन्हको लहर देखिएपछि पर्सा जिल्लाका निर्वाचन क्षेत्र नं. १, २, ३ र ४ का एमाले उम्मेदवारहरूले पराजय बेहोरेका छन् । तर उनीहरूले प्राप्त गरेको मतलाई सन्तोषजनक रूपमा लिइएको ती नेताको भनाइ छ ।
मधेश प्रदेशका अन्य जिल्लामा एमाले उम्मेदवारहरूले १२ हजार मतसमेत कटाउन नसकेको अवस्थामा पर्साका उम्मेदवारहरूले अपेक्षाकृत राम्रो मत ल्याएको एमाले नेताहरूको दाबी छ । पार्टीले समग्र रूपमा कमजोर नतिजा व्यहोरे पनि मतपरिणाम र हारका कारणबारे आन्तरिक समीक्षा भइरहेको र थप ऊर्जा साथ पुनः उठ्ने दाबी गरिएको छ ।
पर्सा निर्वाचन क्षेत्र नं. २ मा एमाले उम्मेदवार रिमा यादवले ११ हजार ६ सय ५, क्षेत्र नं. ३ मा रुपेश पाण्डेले ११ हजार ९ सय १४ र क्षेत्र नं. ४ मा जालिम मियाँले १२ हजार १ सय ४५ मत प्राप्त गरेका थिए । क्षेत्र नं. १ बाहेक अन्य तीनवटै क्षेत्रमा एमाले उम्मेदवारहरू तेस्रो स्थानमा सीमित भए।
राष्ट्रिय स्वतन्त्र पार्टीले मधेश प्रदेशका ३२ सिटमध्ये ३१ सिटमा जित निकाले पनि कानुनी अड्चनका कारण एक सिट गुमाउनुपरेको थियो । रास्वपाले ३० सिटमा अन्य दलका उम्मेदवारहरूलाई ठूलो मतान्तरले पराजित गरेको जनाइएको छ।
प्रदीप यादवलाई जनता समाजवादी पार्टी नेपालले टिकट नदिएपछि उनी एमाले प्रवेश गरी चुनाव लडेका थिए । उता, जनता समाजवादी पार्टी नेपाल (जसपा) का मधेश प्रदेश अध्यक्ष उपेन्द्र यादव बाहेक अन्य अधिकांश उम्मेदवारहरूको जमानत जफत भएको बताइएको छ । पर्साका चारै निर्वाचन क्षेत्रमा जसपा नेपालका उम्मेदवारहरूले जमानतसमेत जोगाउन सकेनन् ।
