वीरगंज । पर्साकाे कालिकामाई गाउँपालिका वडा नं. ५ बिरन्चीबर्वामा एक कार्यक्रमका बीच विद्यालय भवन निर्माण कार्यको शिलान्यास गरिएको छ।
श्री दिव्य कन्या माध्यमिक विद्यालयमा ४ कोठे, २ तल्ले भवन निर्माण कार्यको गाउँपालिका अध्यक्ष बशिष्ट कुमार गुप्ताले शिलान्यास गरेका हुन्।
शिलान्यास कार्यक्रममा अध्यक्ष गुप्ताले निर्माण कार्य गुणस्तरीय र समयमै सम्पन्न गर्न निर्देशन दिएका छन् । उनले भवन निर्माणपछि विद्यालयमा कक्षा कोठाको अभाव हट्ने विश्वास व्यक्त गरे ।
गाउँपालिकाका अनुसार पालिका स्तरीय योजना अन्तर्गत ५५ लाख ८५ हजार ६७३ रुपैयाँको लागतमा भवन निर्माण हुने छ। जनसेवा भवन निर्माण उपभोक्ता समितिद्वारा निर्माण गरिने उक्त भवनको काम २०८३ साल वैशाख १५ गतेभित्र सम्पन्न गर्ने लक्ष्य राखिएको छ।
वडा अध्यक्ष जयनारायण पटेलको अध्यक्षतामा सम्पन्न कार्यक्रममा विद्यालयका प्रधानाध्यापक जतन राउत, उमेश तिवारी, उमेश चौहान, बृजेश तिवारी, महन्त राउत, सुमेश तिवारी, बृजकिशोर चौहान लगायत वडा सदस्य तथा महिला सदस्यहरूको सहभागिता रहेको थियो।
