पाेखरिया । पर्साको पोखरिया नगरपालिकामा पछिल्लो समय संस्थागत रूपमा ठगी धन्दा बढ्दै गएको भन्दै गम्भीर चिन्ता व्यक्त गरिएको छ। आम नागरिक, विशेषगरी बेरोजगार युवाहरूबाट प्राप्त गुनासोअनुसार नोकरीको प्रलोभन देखाई रकम असुल्ने, लामो समय काम गराएर तलब नदिने जस्ता घटनाहरू बढ्दै गएका छन्।
राष्ट्रिय मुक्ति पार्टीका सह–महासचिव नेजामुदिन सम्मानीले साेमबार एक विज्ञप्ति जारी गर्दै नगरपालिकाभित्र विभिन्न शीर्षकमा आर्थिक अनियमितता र ठगी भइरहेको आरोप लगाएका छन् । उनका अनुसार कर वृद्धि गर्ने नाममा अनावश्यक शुल्क असुली गरिएको, ३०० रुपैयाँ लाग्ने सम्पत्ति करलाई १५०० रुपैयाँसम्म पुर्याइएको र विरोधपछि सामान्य रूपमा मात्र घटाइएको जानकारी आएको छ।
त्यस्तै, नगर विस्तार तथा विकास योजनाको नाममा नागरिकहरूबाट रकम उठाउने तथा भ्रम सिर्जना गर्ने गतिविधि समेत बढेको आरोप लगाइएको छ । विकास योजनाको DPR (डिटेल प्रोजेक्ट रिपोर्ट) बनाउने क्रममा समेत आर्थिक अनियमितता भएको दाबी गरिएको छ।
सम्बन्धित निकायलाई पटक–पटक ध्यानाकर्षण गराउँदा पनि कुनै ठोस पहल नभएको भन्दै उनले आपत्ति जनाएका छन् । जनताको सेवा र विकासका लागि जिम्मेवार निकायबाटै आर्थिक शोषण भइरहेको भन्दै स्थानीय स्तरमा आक्रोश बढ्दै गएको उनले उल्लेख गरेका छन्।
विज्ञप्तिमार्फत तत्काल निष्पक्ष छानबिन गर्न, दोषीमाथि कडा कानुनी कारबाही गर्न, पीडितलाई क्षतिपूर्ति उपलब्ध गराउन तथा कर प्रणालीलाई पारदर्शी र जनमैत्री बनाउन माग गरिएको छ। साथै, यस्ता गतिविधि दोहोरिन नदिन कडा अनुगमन र नियन्त्रण व्यवस्था लागू गर्नुपर्नेमा जोड दिइएको छ।
अन्त्यमा उनले नागरिकलाई आफ्नो अधिकारका लागि एकजुट हुन, अन्याय र भ्रष्टाचारविरुद्ध आवाज उठाउन र सत्य तथा न्यायको पक्षमा उभिन आह्वान गरेका छन्।
