वीरगंज । पर्सामा प्रतिबन्धित लागुऔषध ट्रामाडोल ट्याब्लेटसहित दुई जना पक्राउ परेका छन् ।
जिल्ला प्रहरी कार्यालय पर्साका अनुसार आइतबार दिउँसो करिब १२:१५ बजे वीरगंज महानगरपालिका वडा नं. १४ गण्डक चोकस्थित सवारी साधन चेकजाँचका क्रममा उनीहरूलाई पक्राउ गरिएको हो । प्रहरी चौकी गण्डकबाट खटिएको प्रहरी टोलीले वीरगंज बसपार्कबाट काठमाडौँतर्फ जाँदै गरेको ना.१ ज २७६५ नम्बरको रातो रंगको टाटा सुमो गाडी रोकी जाँच गर्दा प्रतिबन्धित लागु औषध बरामद भएको हो।
प्रहरीले गाडीको छतमा पहेँलो त्रिपालले ढाकी राखिएको हरियो रङको जेब्रा झोला तथा पहेँलो–कालो रङको बोराभित्र लुकाइछिपाइ राखिएको TRAMADOL HYDROCLORIDE CAPSULES IP 50MG लेखिएको ५२ हजार ३०० ट्याब्लेट फेला पारेको जनाएको छ।
उक्त घटनामा संलग्न रहेको आरोपमा बारा जिल्ला परवानीपुर गाउँपालिका वडा नं. १ रहरिया डिह बस्ने ४२ वर्षीय राम अशिष राउत अहिर र पर्सा बहुदरमाई नगरपालिका वडा नं. २ सिसियाडी बस्ने ३० वर्षीय सुवास सर्राफलाई पक्राउ गरिएको प्रहरीले जनाएको छ ।
पक्राउ परेका दुवै जनालाई बरामद लागुऔषधसहित नियन्त्रणमा लिई लागुऔषध सम्बन्धी कसूरमा पर्सा जिल्ला अदालतबाट सात दिनको म्याद थप अनुमति लिई थप अनुसन्धान भइरहेको जिल्ला प्रहरी कार्यालय पर्साका प्रहरी उपरीक्षक सुदीप राज पाठकले जानकारी दिए । उनले लागु औषधकाे मुख्य काराेबारीकाे खाेजी कार्य भइरहेकाे समेत वताए ।
