वीरगंज । मुर्लीस्थित सगरमाथा एकेडेमीले आफ्नो १९औँ वार्षिक उत्सव तथा पुरस्कार वितरण कार्यक्रम सम्पन्न गरेको छ। विद्यालयका संस्थापक तथा प्रिन्सिपल जियालाल गुप्ताको अध्यक्षतामा सम्पन्न कार्यक्रमको उद्घाटन शिक्षा विकास तथा समन्वय समिति इकाई पर्साका अधिकृत विद्यानन्द प्रसाद यादवले गरेका थिए।
कार्यक्रममा नेशनल प्याब्सनका केन्द्रीय वरिष्ठ उपाध्यक्ष रामविनय चौरसिया, केन्द्रीय सदस्य अरविन्द सिंह, प्याब्सन वीरगंज महानगर अध्यक्ष राहुल श्रीवास्तव, सिटी स्कूलका संस्थापक संतोष गुप्ता, गूगल स्कूलका संस्थापक नरेश पटेल, पर्सा म्यानेजमेन्ट स्कूलका संस्थापक प्रकाश यादव, शालोम स्कूलका संस्थापक कौशल श्रीवास्तव तथा गौतम श्रीवास्तव लगायत विभिन्न विद्यालयका प्रतिनिधिहरूको उपस्थिति रहेको थियो।
वार्षिक उत्सवको अवसरमा विद्यालयका विद्यार्थीहरूले नृत्य, गीत, नाटक तथा अन्य सांस्कृतिक प्रस्तुतिहरूमार्फत आफ्नो प्रतिभा प्रस्तुत गरेका थिए। कार्यक्रममा शैक्षिक, खेलकुद तथा अतिरिक्त क्रियाकलापमा उत्कृष्ट प्रदर्शन गर्ने विद्यार्थीहरूलाई प्रमुख अतिथि र सभापतिद्वारा शिल्ड, मेडल र प्रमाणपत्र प्रदान गरी सम्मानित गरिएको थियो।
